Disa Klinika Kirurgjike të Qendrës Klinike Universitare të Kosovës, nuk kanë punuar, ani pse greva e punëtorëve shëndetësorë ishte 24-orëshe dhe do të duhej të përfundonte të martën në orën 7 të mëngjesit. Federata Sindikale e Kosovës, është distancuar nga ky veprim i kirurgëve.
Qendra Klinike Universitare e Kosovës nuk ishte komplet funksionale gjatë së martës.
Kjo pasi disa klinika të Kirurgjisë së QKUK-së, e kanë vazhduar grevën, ani pse Federata Sindikale e Shëndetësisë, grevën e shpalli të mbyllur në orën 7 të mëngjesit.
Familjari i një pacienteje të shtrirë në Kirurgjinë Torakale është ankuar se nëna e tij nuk është operuar tash e 2 ditë, ani pse e kishte terminin e caktuar.
Por, këtë e ka mohuar drejtori i Klinikës Torakale, Saudin Maliqi. Ai i ka thënë KTV-së nëpërmjet telefonit se është punuar gjatë ditës.
Mirëpo, Klinika e Kirurgjisë Abdominale dhe ajo e Syve, e kanë vazhduar grevën dhe nuk dihet se sa do të zgjasë ajo.
Por, ekipi i TV ARTA-s nuk është lejuar të xhirojë brenda klinikave të QKUK-së.
Se janë në grevë, e ka konfirmuar shkurt nëpërmjet telefonit drejtori i Kirurgjisë Abdominale.
E njëjta është konfirmuar edhe për Klinikën e Syve.
“E kanë vazhduar grevën e kirurgëve paralelisht me grevën tjetër dhe është dashur që të anulohet komplet programi operativ. Është e papritur për mua, por kolegjiumi ka vendosur kështu”.
E, zyrtarë të Federatës Sindikale të Shëndetësisë së Kosovës janë distancuar nga greva e këtyre klinikave, megjithatë e kanë mbështetur kauzën e kirurgëve.
Në një konferencë për media, u tha se me datën 20 dhjetor, do të mbahet një mbledhje, në të cilën do të diskutohet për masat e tjera sindikale.
Por, drejtori i SHSKUK-së, Basri Sejdiu, tha se në përgjithësi grevat e punëtorëve shëndetësorë nuk duhet të zgjasin pasi dëmtohen pacientët.
Punëtorët shëndetësorë po kërkojnë ngritjen e pagave për mjekët dhe punëtorët teknikë të këtij sektori.
© KOHA. Të gjitha të drejtat janë të rezervuara.
