Kosnetti thotë se qeveritarët në Kosovë marrin mito dhe pengojnë drejtësinë

Njerëz që punojnë në Qeverinë e Kosovës, marrin mito dhe punësojnë të afërm.

Këtë e tha Philip S. Kosnett, ambasador i ri i SHBA-së në Prishtinë, në ditën e dytë të Javës Kundër Korrupsionit, raporton KTV.

Pothuajse të gjithë ambasadorët pjesëmarrës në këtë organizim, thanë se Kosova ka miratuar ligje shumë të mira dhe ka bërë reforma në sektorin e drejtësisë, por po i zbaton me vështirësi.

Kur flitet për ndërhyrjet në Gjyqësor dhe punësimet familjare, dihet se për kë po flitet, tha ambasadori i Mbretërisë së Bashkuar, Ruairi O’Connell.

Shefja e Zyrës së BE-së në Kosovë, Nataliya Apostolova, tha se korrupsioni e prish imazhin e Kosovës.

IKD-ja ka publikuar raportin lidhur me ushtrimin e funksioneve publike të zyrtarëve të sistemit të drejtësisë në përputhje me Ligjin mbi Konfliktin e Interesit.

Ehat Miftaraj, Drejtor ekzekutiv në IKD, tha se janë 4 mijë dokumente të vërtetuara nga deklarimi i pasurisë, ku del se 563 zyrtarë mbajnë më shumë se një pozitë zyrtare, të cilët ai i quajti si “Supermen”.

Shaip Havolli nga Agjencia Kundër Korrupsionit, tha se kanë trajtuar një numër të madh të rasteve, ku 78 janë për konflikt interesi, 2 janë për hetime dhe 1 është proceduar në gjykatë.

Java Kundër Korrupsionit do të vazhdojë deri të premten.