Dua Lipa me dy nominime për Grammy Awards, në njërën ka konkurrente Bebe Rexhën

07 December 2018 19:48

Dy këngëtare shqiptare, Dua Lipa dhe Bebe Rexha, janë nominuar për shpërblimet Grammy. Lipa është nominuar në dy kategori e në atë për artisten më të mirë të re do të garojë kundër Bebe Rexhës.

Nominimet për ceremoninë e 61-të të ndarjes së shpërblimeve Grammy kanë përfunduar. Në mesin e të nominuarve janë edhe dy këngëtare shqiptare, Dua Lipa dhe Bebe Rexha.

Lipa madje, është e nominuar në dy kategori. Në njërën prej tyre, artisja më e mirë e re, përpos emrave të tjerë, do të garojë kundër Bebe Rexhës.

Lidhur me nominimet, të dyja këngëtaret tashmë janë deklaruar në Instagram. Lipa ka shkruar se është mirënjohëse për nominimet që ka marrë, e në videon e publikuar nuk ndalej dot së qari.

Me të qara, këtë lajm e ka përcjellë edhe Bebe Rexha, e cila shkroi në Instagram se ëndrra e saj është realizuar.

Kategoria e dytë në të cilën është nominuar Dua Lipa, është kënga më e mirë dance, për këngën Electricity.

Në kategorinë e artistes më të mirë të re Lipa e Rexha, do të garojnë kundër emrave si Luke Combs apo Greta Van Fleet.

Sidoqoftë, në garën për shpërblimet Grammy, prin Kendrick Lamar me 8 nominime.

Dua Lipa ka shënuar suksese të jashtëzakonshme gjatë 2018-s. Në shkurt, ajo fitoi dy kategori të Brit Awards, çmimi më prestigjioz muzikor që jepet në Britani të Madhe.

© KOHA. Të gjitha të drejtat janë të rezervuara.

Të ngjashme