Kosova s’heq dorë nga ushtria, as pas diskutimit Haradinaj – Stoltenberg

06 dhjetor 2018 19:08

Transformimi i FSK-së në Ushtri është në kundërshtim me këshillat e shteteve anëtare të NATO-s.

Ky ka qenë mesazhi që ua ka përcjellë përmes telefonit Sekretari i Përgjithshëm i NATO-s, Jens Stoltenberg, kryeministrit të Kosovës Ramush Haradinaj dhe presidentit të Serbisë Aleksandër Vuçiq, raporton KTV.

Megjithatë, Stoltenberg u ka kërkuar të dy liderëve që të përmbahen dhe t’i shmangin provokimet.

Stoltenberg, më tutje, ka thënë se i ka informuar ata rreth takimit të së mërkurës të ministrave të jashtëm të shteteve anëtare të NATO-s.

“Kam përsëritur që mandati i FSK-së duhet të evoluojë, por NATO duhet ta ekzaminojë nivelin e angazhimit me FSK-në”, i ka thënë Sekretari i NATO-s Haradinajt, përmes telefonit.

Ndërsa, me presidentin Vuçiq, Sekretari i NATO-s ka biseduar rreth nevojës për qetësimin e situatës dhe tensioneve aktuale.

Stoltenberg, të dy liderëve ua ka përkujtuar se dialogu i ndërmjetësuar nga Brukseli mbetet rruga e vetme për një paqe të qëndrueshme dhe stabilitet në rajon.

E, përkundër këtyre deklaratave të Sekretarit të NATO-s, kreu i ekzekutivit, Ramush Haradinaj, të enjten, ka paralajmëruar se 14 dhjetori është dita kur pritet që Kosova të bëhet me Ushtri.

Megjithatë, Haradinaj ka shprehur shqetësimin e tij për tentativat e Serbisë për ta destabilizuar vendin.

Derisa, ka mohuar deklaratat e Serbisë se FSK-ja po përgatitet në veri.

Ndërsa, më i butë në deklarimet e tij ka qenë presidenti i Serbisë, Aleksandër Vuçiq.

Ai, gjatë një interviste për mediat serbe, ka thënë se Serbia është në situatë të vështirë, por ka theksuar se nuk i pëlqen fjala luftë.

“Nuk dua ta përdor këtë fjalë – luftë. Ndërsa, më duket se në Kosovë nuk po kuptohet dimensioni i katastrofës që mund të nxitet. I lus njerëzit atje t’i thërrasin mendjes. Jemi në situatën jo vetëm të luajmë shah me ata që kanë ndihmën e 10 pëshpëritësve, ashtu siç i kanë ata nga Gjermania, Britania e Madhe, Franca. Dhe ne duhet të mendojmë jo vetëm se çfarë kush ka ndër mend , por a do të ngrehet dikush që ta godasë me tabelë (të shahut) veten dhe të tjerët. Kur e keni një kundërshtar të tillë të paparashikueshëm, ky gjithsesi që është problem", ka thënë Vuçiq.

Një ditë më parë, ishte kryeministrja e Serbisë, Ana Brnabiq, e cila kishte qenë e ashpër në deklarimet e saja, duke theksuar se shpreson se Serbisë nuk do t’i duhet ta përdorë ushtrinë e saj, pas formimit të Ushtrisë së Kosovës.

© KOHA. Të gjitha të drejtat janë të rezervuara.

Të ngjashme