Është bërë hera e dytë brenda një jave që deputetët mblidhen në sallë plenare, por seanca nuk mbahet.

Pas dështimit të së martës kur deputetët u mblodhën për të diskutuar për ligjet që nuk i kishin, këtë të premte seanca e jashtëzakonshme dështoi në mungesë të deputetëve e Kabinetit Qeveritar, raporton KTV.

Për dështimet e skandalet e diplomacisë kosovare u vendos të diskutohet pas datës 20 nëntor, ditë kjo kur pritet të ndodhë votimi për anëtarësimin e Kosovës në Interpol.

Pikërisht kjo ishte arsyeja e mungesës së Kryeministrit e Ministrit të Jashtëm, ani pse ndryshe nga Pacolli që të enjten vonë ka udhëtuar për në Dubai, Kryeministri ishte në Prishtinë.

Deputetët opozitarë e kanë quajtur këtë papërgjegjësi të koalicionit qeverisës, për të cilin thanë se tash nuk e ka më as shumicën në Kuvend.

Ndërkohë, partitë në pushtet thanë se qëllimisht opozita ka insistuar që të mbahet seanca vetëm 4 ditë para votimit për Interpol.

Kështu, me 57 vota për e 5 kundër, deputetët vendosën që seanca të shtyhet deri në një vendim tjetër të Kryesisë.