Ish-kryetari i komunës së Lipjanit, Shukri Buja, të hënën, në Gjykatën Themelore të Prishtinës, erdhi i buzëqeshur dhe mjaft i relaksuar.
Por, kur gjykatësi Beqir Kalludra në fjalën e tij përfundimtare e shpalli atë fajtor, disponimi i tij ndryshoi, raporton KTV.
Buja, për keqpërdorim të detyrës zyrtare sa udhëhiqte me këtë komunë, nga gjykata u dënua me 3 vjet burgim.
Ekzekutimi i dënimit ndaj Bujës bëhet, pasi vendimi të jetë i plotfuqishëm.
I akuzuari i dytë në këtë rast, Nebih Zeqiri, është dënuar me 2 vjet e gjysmë burgim.
Fajtor është shpallur edhe i akuzuari tjetër, Halit Gashi, i cili është dënuar me gjashtë muaj burgim dhe të njëjtit, dënimi mund t’i shndërrohet në gjobë prej 3500 eurosh.
Ndërkaq, Hasim Vishesella është dënuar me 5 muaj burgim e biznesmeni, Fahri Retkoceri është liruar nga akuza.
Me nga gjashtë muaj burgim janë dënuar edhe Edmond Rexhepi dhe Bajram Rizani, të cilëve po ashtu dënimi mund t’u shndërrohet në gjobë prej 3500 eurosh.
Ndërsa, Driton Avdiu, Magbule Sadiku e Burim Kodra, të akuzuar të tjerë, janë liruar nga akuza.
Pas shpalljes së aktgjykimit, Buja, dënimin e ka lidhur me procesin e liberalizimit të vizave, derisa ka shtuar se ky rast është i orkestruar nga politika, por nuk ka pranuar të flasë me emra se në kë po aludon konkretisht.
Komuna e Lipjanit në marsin e 2008-s kishte nënshkruar memorandum me kompaninë “New Co Feronikel Complex LL. C.” për dhënien me qira kësaj kompanie të një ndërtese të laboratorit në Lipjan.
Kjo e fundit, për 10 vjet sa i ishte dhënë në shfrytëzim objekti, sipas memorandumit, ishte e obliguar që komunës t’i paguajë vetëm një euro në muaj qira, duke i shkaktuar kështu dëm buxhetit të komunës.
© KOHA. Të gjitha të drejtat janë të rezervuara.
