Policia mundohet të justifikojë mosveprimin ndaj Valbonës duke thënë se ajo nuk kërkoi mbrojtje

10 gusht 2018 19:09

Nga Gjakova erdhën deri në Prishtinë, në përpjekje për ta arsyetuar mënyrën se si kishin vepruar Policia dhe Prokuroria në parandalimin e vrasjes së dyfishtë që ndodhi të martën në Brekoc të Gjakovës.

Ndonëse viktima, 5 orë para vrasjes, e kishte lajmëruar kërcënimin që asaj po i bëhej, drejtori rajonal i policisë në Gjakovë, Ahmet Hasi, ka një justifikim. Thotë se Valbona e njoftoi policinë se po kërcënohej por nuk kërkoi mbrojtje, raporton KTV.

E mbrojtësi i viktimave nga Prokuroria Themelore në Gjakovë, Agim Pula, ka thënë se viktimës i ishte ofruar strehim por ajo e kishte refuzuar.

Por të gjitha këto deklarime i ka mohuar vëllai i viktimës, Shkëlzen Marku.

Ai ka thënë se ka kohë që Valbona Nrecaj i kishte kërkuar ndihmë dhe mbrojtje policisë por asaj asnjëherë nuk iu ofrua ndihma.

KTV-ja ka kërkuar sqarime nga Prokuroria në Gjakovë për mënyrën se si ishte trajtuar në të kaluarën ky rast i dhunës në familje dhe prej kohës kur ndaj të dyshuarit ishte ngritur aktakuza për lëndim të lehtë trupor ndaj Valbona Nrecajt.

Kjo prokurori, përmes një përgjigjeje me shkrim, ka thënë se gjatë asaj kohe të ndjerës i ishte ofruar siguri.

“Menjëherë pas paraqitjes së rastit në polici, viktimës i ishte sugjeruar qëndrimi në shtëpinë e sigurt, por ajo kishte kërkuar të shkojë në shtëpinë e prindërve të saj. Prokuroria si gjithmonë edhe në vazhdim do t’i trajtojë rastet me seriozitet të plotë, sidomos ato që i përkasin dhunës në familje”, thuhet në përgjigjen nga Prokuroria Themelore, Gjakovë.

Ndryshe, të enjten, Gjykata në Gjakovë ia ka caktuar masën e paraburgimit Pjetër Ncrecaj në spitalin e Gjakovës.

Avokatja e të dyshuarit, Fehmije Zhubi, ka konfirmuar se pasi atij i është përmirësuar gjendja shëndetësore, nga Instituti i Psikiatrisë Forenzike është sjellë në spitalin e psikiatrisë në Gjakovë, ku edhe është zhvilluar seanca gjyqësore ndaj tij.

© KOHA. Të gjitha të drejtat janë të rezervuara.

Të ngjashme