Presidenti s’mohon se do të ketë shkëmbim territoresh, akuzon mediat

30 July 2018 19:01

Nga një president i mbyllur, Hashim Thaçi, qëkur u kthye nga takimi i fundit me Aleksandër Vuçiqin në Bruksel, ka nisur të hapet për media, por sërish po përzgjedh pyetjet që do t’u japë përgjigje.

Në ditën e parë pas zisë për Demaçin, ai ka vënë kurora lulesh te varri i tij, duke dalë në mini-konferencën e 5-të brenda dy javësh, nga ku ka akuzuar mediat për lajme të rrejshme, duke i cilësuar shkrimet për shkëmbim territoresh “pa adresa” dhe që bëhen me qëllim të krijimit të konfuzionit, raporton KTV.

Por, presidenti nuk ka mundur të zotohet se nuk do të ketë shkëmbim territoresh, përkundrazi ka lënë të hapur këtë mundësi, duke u deklaruar se dy shtete të pavarura mund të nënshkruajnë çfarëdo marrëveshje.

Fillimisht refuzoi t’i përgjigjej pyetjes së KTV-së dhe më vonë insistoi se do të ketë kohë për ta pyetur, ndërsa në fund u largua pa përgjigje kur u pyet për liqenin e Gazivodës.

“Koha Ditore” ka shkruar sot se pala kosovare ka në plan t’i japë hov idesë së shkëmbimit të territoreve me Serbinë.

Burime të gazetës, të afërta me këto zhvillime, kanë thënë se opsion është që komuna më veriore e Kosovës – Leposaviqi, bashkë me Leshakun, të shkëmbehen me Preshevën dhe një pjesë të Bujanocit.

Pjesë e marrëveshjes do të jetë edhe liqeni më i madh artificial që gjendet në veri, Gazivoda.

Ky liqen ka kapacitet të furnizojë me ujë gjysmën e Kosovës.

© KOHA. Të gjitha të drejtat janë të rezervuara.

Të ngjashme