I konsideruar si sulmuesi i ardhshëm i madh i Italisë, Pio Esposito, po e shfaq plotësisht potencialin e tij.
Të enjten mbrëma Esposito i shënoi dy gola në një paraqitje dominuese, ndërsa Italia mposhti Francën me rezultatin 3:1 në kuadër të Ligës së Kombeve. Ishte në fakt fitore historike. Italia nuk kishte fituar në shtëpi ndaj Francës për plot 64 vjet.
Sulmuesi 21-vjeçar tani i ka nëntë gola në 14 ndeshje për Italinë. Kjo formë ka ndihmuar në zbehjen e kujtimeve të hidhura të Italisë nga Bosnjë-Hercegovina në plejofin për kualifikim në Kupën e Botës.
Goli i dytë i Espositos të enjten u shënua nga penalltia, duke vendosur rezultatin 3:1 në minutën e 75-të. Ishte penalltia e parë e gjuajtur prej tij që kur humbi një të tillë në serinë e penalltive kundër Bosnjës. Ajo humbje e la Bosnjën jashtë Botërorit për herë të tretë rresht.
“Kur shkova te pika e bardhë, ajo kujtesë më është kthyer. Por nuk mund të fshihesha gjithë jetën. Duhet të gjesh guximin për të gjuajtur sërish”, ka thënë Esposito.
Penalltia kishte edhe peshë tjetër shtesë. Vëllai i madh i Pios, Sebastiano, humbi penallti vetëm 15 minuta më herët, kur rezultati ishte 1:1.
“Kishte edhe një përgjegjësi shtesë – të bëja njerëzit të harronin gabimin e vëllait tim. Kur ai bëri atë gabim, ishte e vështirë edhe për mua. Ndaj duhej të vendosja rezultatin edhe për hir të tij”, ka thënë Pio.
Trajneri i Italisë, Roberto Mancini, u duk po aq i habitur sa shumica e të pranishmëve në “San Siro”, kur Sebastiano doli për të gjuajtur penalltinë e parë. Ai gjuajti jashtë portës.
Mancini konfirmoi se Pio ishte i pari në listën e ekzekutuesve, ndërsa Sebastiano i dyti.
“Ishte çështje familjare”, tha Mancini i buzëqeshur.
Kur Italia e fitoi penalltinë e dytë, Mancini u kthye nga Sebastiano, i cili ishte zëvendësuar tashmë, dhe e pyeti me shaka nëse donte ta gjuante edhe atë. Të dy qeshën.
Ka qenë një ngritje e jashtëzakonshme për Pio Espositon, i cili deri në fillim të edicionit të kaluar luante në Serie B. Ai shpërtheu në edicionin e kaluar me Interin.
Të enjten i riu u duartrokit nga mbi 71 mijë shikues, në momentin kur u zëvendësua në kohën shtesë.
Pio Esposito mund të jetë sulmuesi që do t’ia marrë “kurorën” Gigi Rivas, golashënuesit më të mirë në historinë e Italisë me 35 gola. Është një rekord që qëndron prej 52 vjetësh.
“Shpresojmë që ai të shënojë edhe shumë gola të tjerë, pasi Gigi Riva ka qëndruar në krye për një jetë të tërë”, tha Mancini. “Shpresojmë që dikush ta kalojë atë, për të mirën e Italisë”.
Italia të dielën mbrëma luan në udhëtim ndaj Belgjikës. Nëse fiton, kalon në çerekfinale të Ligës së Kombeve si fituese e grupit. Franca luan me Turqinë.
Italia dhe Franca kanë nga dhjetë pikë, Belgjika nëntë, ndërsa Turqia është pa pikë në grupin A1.