-
Çeviren: Flutura Gashi-Mehmeti
- 3 Kasım 2026 09:36
- Şurada paylaş:
Forcat ruse kanë bombarduar të hënën një shkollë që përdorej si pikë e shpërndarjes së ndihmave humanitare në një fshat të rajonit juglindor të Zaporizhzhias në Ukrainë, duke vrarë 29 persona, kanë njoftuar presidenti ukrainas, Volodymyr Zelensky, dhe shërbimet e emergjencës të vendit.
Shërbimet e emergjencës bënë të ditur se në mesin e viktimave ishin edhe dy pjesëtarë të ekipit të shpëtimit dhe katër policë në fshatin Komyshuvakha. Pesë persona po trajtohen në spital, përfshirë dy punonjës të ekipeve të shpëtimit.
Në një videofjalim, Zelensky ka thënë se forcat ruse fillimisht hodhën bomba ajrore mbi një shkollë në fshat, e cila përdorej si strehimore dhe si pikë e shpërndarjes së ndihmave humanitare çdo të hënë.
Në shkollë nuk zhvilloheshin mësime, ka thënë ai, pasi fshati, i cili ndodhet në juglindje të qytetit kryesor të rajonit, që gjithashtu quhet Zaporizhzhia, ishte shumë afër vijës së frontit në luftën që po vazhdon prej katër vjetësh e gjysmë.
“Rusët goditën pikërisht kur njerëzit po mbërrinin, me disa bomba ajrore. Më pas pasoi një sulm i dytë, më shumë bomba ajrore, këtë herë mbi strehimoren. Një sulm i poshtër terrorist”, ka thënë ai.
Zelensky ka shtuar se rusët nuk mund të mos e dinin se banorët që kishin mbetur në Komyshuvakha mblidheshin çdo javë për të marrë pako me ndihma humanitare.
Sipas tij, sulmi dëshmoi se Moska ishte e përqendruar në vrasjen e njerëzve, në vend që të vazhdonte përpjekjet humanitare të javës së kaluar në qytetin e rrethuar të Oleshky, të cilat ishin ndërmjetësuar nga zonja e parë e SHBA-së, Melania Trump.
“Rusët vazhdojnë të dëshmojnë, herë pas here, urrejtjen e tyre ndaj Ukrainës dhe gjithçkaje që ekziston këtu”, ka thënë ai.
“Nëse Rusia do të dëshironte vërtet uljen e tensioneve, pas situatës në Oleshky do të kishte pasur mundësi të vazhdonte me hapa të tjerë humanitarë. Ne e propozuam këtë. Por Rusia vazhdon të vrasë njerëz”, ka shtuar.
Ministri i Jashtëm i Ukrainës, Andrii Sybiha, duke iu referuar sulmit, u ka bërë thirrje vendeve që të kundërshtojnë pjesëmarrjen e Rusisë në garat më të rëndësishme sportive, pas një vendimi të gjykatës më të lartë të sportit që urdhëroi rikthimin e vendit në turnetë e mëdha.
“Rusia meriton dënim, izolim dhe pasoja, jo rikthim të legjitimitetit në arenën ndërkombëtare”, ka shkruar Sybiha në X. “Krimet e saj nuk mund të ndahen nga flamuri i saj, ekipet kombëtare apo përpjekjet për të rifituar legjitimitetin ndërkombëtar”.
Sulmi ka ndodhur një ditë pas përfundimit të një armëpushimi lokal gjashtëditor, i cili ishte arritur për të mundësuar dërgimin e ndihmave në Oleshky, në jugperëndim të rajonit të Khersonit, si dhe evakuimin e banorëve që dëshironin të largoheshin.
Në Uashington, një zyrtar i lartë amerikan i ka thënë Reutersit se SHBA-ja do të mbledhë delegacionet e Ukrainës dhe Rusisë në Abu Dhabi më 10 dhe 11 nëntor, për të diskutuar hapat drejt përfundimit të luftës, marrëveshjet e sigurisë pas luftës dhe uljen e tensioneve.
Negociatorët amerikanë po përpiqen të arrijnë një përparim në negociatat për konfliktin e gjatë, para fillimit të dimrit. Bisedimet e fundit të paqes të ndërmjetësuara nga SHBA-ja janë zhvilluar në shkurt, përpara se SHBA-ja dhe Izraeli të nisnin luftën kundër Iranit.