Yemen'de kadınlar, kurabiyelerden silahlara kadar çeşitli ürünlerle Taiz şehrini savunmak için seferber oldu.

Përballë rrezikut gjithnjë e më të madh nga sulmet e luftëtarëve Houthi, gratë në qytetin Taiz të Jemenit po luajnë një rol të ri në mbrojtjen e vendit të tyre. Ajo që nisi si një nismë për përgatitjen e biskotave dhe dërgimin e ushqimeve për ushtarët në front, tashmë është zgjeruar në mbledhjen e fondeve për blerjen e armëve dhe municioneve. Rrethimi i qytetit dhe vështirësitë në furnizimin me produkte bazë kanë shtuar shqetësimin e banorëve. Gratë thonë se ndihen të detyruara të veprojnë për të ndihmuar forcat që po mbrojnë qytetin

Ndërsa luftëtarët Houthi po e shtrëngojnë rrethimin e qytetit Taiz, në jugperëndim të Jemenit, gratë që fillimisht organizonin dërgesa ushqimore për ushtarët që mbronin qytetin, tani kanë nisur të mbledhin para për blerjen e armëve dhe municioneve.

Këto nisma kanë filluar spontanisht që nga rifillimi i luftimeve, në fillim të shtatorit, në zonat rurale në perëndim të provincës Taiz. Përballë njëra-tjetrës janë forcat e qeverisë së njohur ndërkombëtarisht, të mbështetura nga Arabia Saudite, dhe grupi i armatosur Houthi, i mbështetur nga Irani.

Fillimisht, gratë vullnetare u bashkuan për të përgatitur biskota për luftëtarët në vijat e frontit.
Qëllimi ishte “të forcohej lidhja mes komunitetit që i mbështet dhe pjesëtarëve të ushtrisë kombëtare e të forcave popullore të rezistencës proqeveritare, të cilët ndodhen në vijat e frontit për të mbrojtur qytetin e rrethuar, që sulmohet çdo ditë me artileri në përgatitje për një ofensivë”, tha Amira al-Saghir, aktiviste e përfshirë në këtë fushatë.

Nisma për përgatitjen e biskotave përfshiu shumë gra vullnetare dhe u mbështet e u përkrah edhe në rrjetet sociale. Ajo u zhvillua paralelisht me një fushatë më të gjerë të komunitetit për t’u siguruar luftëtarëve ushqime, sende të tjera të nevojshme dhe armë. Kontribute dhanë banorë nga zona dhe fshatra të ndryshme të provincës.

Në Jemen, një vend konservator dhe më i varfri në Lindjen e Mesme, shumica dërrmuese e grave nuk marrin pjesë drejtpërdrejt në luftimet e konfliktit civil, i cili nisi në vitin 2014. Megjithatë, përmes këtyre nismave, ato mund të kontribuojnë në atë që e shohin si mbrojtje të qytetit të tyre nga forcat sulmuese, si dhe të mbështesin burrat që luftojnë.

Pas gati katër vjetësh qetësie relative, pas armëpushimit të ndërmjetësuar nga Kombet e Bashkuara në prill të vitit 2022, forcat Houthi nisën një ofensivë të madhe tokësore në perëndim të Taizit, në fillim të shtatorit.

Grupi i armatosur pushtoi me shpejtësi territore përgjatë bregdetit të Detit të Kuq, përfshirë qytetin portual strategjik të Mokhës, më 10 shtator. Kjo i mundësoi zgjerimin e pranisë pranë Ngushticës Bab al-Mandeb, një korridor i rëndësishëm për transportin detar ndërkombëtar.

Houthit, të njohur edhe si Ansar Allah, që në arabisht do të thotë “Përkrahësit e Zotit”, përparuan më pas drejt zonave të tjera të provincës Taiz. Ata morën nën kontroll rrugët kryesore që të çojnë drejt kryeqytetit të provincës, duke e rrethuar praktikisht qytetin.

Që atëherë, forcat qeveritare kanë ndërmarrë kundërofensiva, ndërsa kontrolli mbi disa zona mbetet i kontestuar.

Rrethimi i ri ka kufizuar ndjeshëm lëvizjen e njerëzve dhe furnizimin e qytetit me mallra jetike, duke shkaktuar mungesa të ushqimeve, karburanteve dhe ilaçeve.

Nga biskotat te armët

Me intensifikimin e luftimeve, nismat e grave u zgjeruan. Ajo që nisi me përgatitjen e biskotave dhe organizimin e dërgimit të ushqimeve për luftëtarët, gradualisht u shndërrua në përpjekje për të mbledhur para dhe për të blerë municione.

Gratë e përfshira në këto nisma i thanë Al Jazeeras se ndiheshin të “detyruara” të vepronin, për shkak të rrezikut që qyteti i tyre të binte në duart e Houthëve.

Ndryshimi nisi kur gjithnjë e më shumë zona rurale ranë nën kontrollin e Houthëve. Disa donatorë filluan të kushtëzonin ndihmat e tyre, duke kërkuar që një pjesë e parave të përdorej për blerjen e municioneve për luftëtarët.

Al-Saghir beson se ky ndryshim u ndikua edhe nga informacionet dhe kritikat që qarkullonin në rrjetet sociale, sipas të cilave, luftëtarët e qeverisë në Taiz nuk kishin municione të mjaftueshme për të vazhduar mbrojtjen e qytetit dhe të vijave të frontit përreth tij.

Nismat morën shpejt përmasa më të mëdha, duke nxitur edhe më shumë gra të përfshiheshin. Mes tyre ishte edhe Huriya Wabel, një aktiviste humanitare.

“Kur pamë se këto milici (Houthit) po zhvillonin një luftë për të shkatërruar qytetin tonë, kuptuam se duhej të ndërmerrnim hapa konkretë për të mbështetur ushtrinë, jo vetëm me ushqime dhe veshmbathje, por edhe me armë. Kjo është veçanërisht e rëndësishme tani që Taizi është i rrethuar dhe furnizimet nuk mund të mbërrijnë më lehtë”, tha Wabel për Al Jazeeran.

Ajo shtoi se shumë civilë dëshironin t’u bashkoheshin forcave të ushtrisë për të mbrojtur qytetin, por nuk kishin armë.

“Prandaj, ndjemë se ishte detyra jonë t’i ndihmonim, duke i përqendruar më shumë përpjekjet tona në këtë drejtim”, tha ajo.

Për të mbrojtur qytetin e tyre

Për Khadija al-Majidi, kalimi nga ndihmat humanitare te furnizimi me pajisje ushtarake është një përgjigje ndaj rrezikut gjithnjë e më të madh që po i kanoset qytetit të Taizit. Ajo thotë se, me qytetin nën rrethim dhe sulmet që vazhdojnë, gratë ndihen të detyruara të bëjnë gjithçka që munden për të ndihmuar në mbrojtjen e tij.

“Kur armiku mbërrin te portat e qytetit tënd dhe e rrethon plotësisht, duke u përgatitur për ta pushtuar me forcë, ndërsa ti, fëmijët dhe familjarët e tu rrezikoni të vriteni, të kapeni robër ose të dëboheni nga shtëpitë tuaja, çfarë prisni të bëjmë ne?”, tha aktivistja për Al Jazeeran.

“A prisnit që t’i çonim lule atij që vjen nga skaji tjetër i vendit për të shkatërruar qytetin tonë dhe për të na vrarë?”, shtoi ajo.

Kur Al Jazeera bisedoi me Al-Majidin, ajo sapo ishte kthyer nga zona e luftimeve pranë malit Jabal Sabir, në jug të Taizit. Ajo kishte shkuar dy herë në front brenda së njëjtës ditë, duke i dorëzuar komandantit municione dhe pajisje të tjera ushtarake, me vlerë rreth 3 mijë dollarë. Krahas tyre, kishte dërguar edhe veshje dimërore, këpucë, ushqime dhe sende të tjera të nevojshme.

Pas më shumë se dhjetë vjetësh të kaluara mes pasojave shkatërruese të luftës në Jemen, Al-Majidi thotë se nuk ka më frikë të shkojë në zonat ku zhvillohen luftime.

“Vizitat e shpeshta në vijat e frontit ndihmojnë shumë në largimin e frikës. Aty shohim guximin dhe trimërinë e luftëtarëve që mbrojnë qytetin, si dhe besimin e tyre se do të fitojnë”, tha ajo.

Ndërkohë, më 8 tetor, departamenti i grave pranë Këshillit të Lartë të Rezistencës Popullore në Taiz nisi një fushatë për të pajisur me pushkë dhe municione 10 mijë luftëtarë proqeveritarë. Këshilli u bëri thirrje jemenasve brenda dhe jashtë vendit që të kontribuojnë për këtë nismë.

Fushata pasqyron ashpërsinë e luftimeve në Taiz, ku forcat qeveritare përballen çdo ditë me sulmet e Huthive dhe përpiqen të ndërmarrin kundërsulme. Ndërsa rrethimi vazhdon, situata ushtarake dhe humanitare po bëhet gjithnjë e më e vështirë, me mungesa të ushqimeve, karburanteve dhe ilaçeve.

Al-Saghir dhe Al-Majidi thanë se shumë prej donacioneve vijnë nga jemenasit që jetojnë jashtë vendit. Megjithatë, edhe banorët që përballen me krizën humanitare po japin aq sa munden për të ndihmuar në mbrojtjen e qytetit.

Al-Saghir tregoi rastin e një gruaje, bashkëshorti i së cilës luftonte në ushtri dhe që kishte dhuruar unazën e martesës. Ndërsa Al-Majidi tha se edhe gra të tjera kishin dhuruar stolitë e tyre prej ari.

Ajo kujtoi gjithashtu një grua që kishte ardhur në shtëpinë e saj me disa zarfe, brenda të cilave kishte para në monedhën jemenase dhe atë saudite. Në zarfe, gruaja kishte shkruar një mesazh që shprehte shpresën për fitoren dhe dëshirën për të ndihmuar luftëtarët.

“Me vullnetin e Zotit, do të fitojmë. Blini municione për heronjtë tanë me këto para”, shkruhej në mesazh.