-
Çeviren: Blerta Haxhiu
- 30 Ekim 2026 13:52
- Şurada paylaş:
Rezultatet përfundimtare të zgjedhjeve në Izrael konfirmuan se blloku i kryeministrit Benjamin Netanyahu ka humbur shumicën parlamentare, duke hapur rrugën për javë negociatash të vështira mes partive me qëndrime shumë të ndryshme politike, nga ato ultraortodokse hebraike te partitë laike dhe ato të udhëhequra nga arabët.
Sipas rezultateve të publikuara të premten herët, blloku i Netanyahut siguroi 53 vende në zgjedhjet e së martës, ndërsa blloku kryesor opozitar fitoi 48. Partitë arabe siguruan 19 vendet e mbetura, një rezultat historik për përfaqësimin e tyre në parlament, raporton AP.
Tashmë, partitë duhet të nisin negociatat për të gjetur një formulë bashkëpunimi që do t’u siguronte të paktën 61 vende në Knesset, parlamentin izraelit, i cili ka gjithsej 120 deputetë.
Megjithatë, Netanyahu, kryeministri me mandatin më të gjatë në historinë e Izraelit, vazhdon të jetë në detyrë.
“Tani vjen pjesa vërtet e vështirë”, shkroi në rrjetin social X politikani i qendrës, Yair Lapid, duke bërë thirrje për durim. Ai shtoi se, pavarësisht heshtjes publike, prapa skenave po zhvillohen diskutime.
Përpara partive qëndrojnë vendime të vështira. Partitë kryesore opozitare, të cilat gjatë fushatës premtuan rrëzimin e Netanyahut, duhet të vendosin nëse do të bashkëpunojnë me partitë e udhëhequra nga arabët, një zgjedhje politikisht e ndjeshme për shumë prej tyre. Një mundësi tjetër është që ato të heqin dorë nga premtimet e fushatës dhe të bashkohen me Netanyahun në një qeveri të koalicionit, e cila mund të përballet me përçarje të brendshme.
Ndërkohë, në Izrael kanë nisur debatet për koalicionet e mundshme. Disa qytetarë shprehën rezerva tradicionale ndaj bashkëpunimit me partitë arabe, ndërsa të tjerë thanë se vendi duhet të kapërcejë këto ndasi dhe t’i përfshijë ato në qeverisje.
“Ka mundësi të ndryshme për të gjitha këto, ndryshe nga Shtetet e Bashkuara, ku ekzistojnë vetëm dy parti”, tha Beny Engalrd, banor i Tel Avivit.
Rezultatet e zgjedhjeve ende duhet të certifikohen dhe t’i dorëzohen presidentit të vendit, Isaac Herzog, të mërkurën e ardhshme. Pas kësaj, presidenti do t’ia besojë njërit prej politikanëve detyrën për formimin e qeverisë së re.
Kjo detyrë mund t’i besohet Netanyahut, si udhëheqësit të partisë që mori më shumë vota, ose një politikani tjetër që, sipas drejtuesve të partive, ka më shumë gjasa të sigurojë mbështetjen e nevojshme parlamentare.
Nëse përpjekjet për formimin e qeverisë dështojnë, Izraeli mund të detyrohet të mbajë zgjedhje të reja në fillim të vitit të ardhshëm. Presidenti Herzog deklaroi këtë javë se do të bëjë gjithçka që është në fuqinë e tij për të shmangur një skenar të tillë.