Udhëheqësit e Finlandës dhe Norvegjisë kanë zhvilluar bisedë telefonike me presidentin rus, Vladimir Putin, në një kontakt të rrallë mes liderëve evropianë dhe kreut të shtetit rus që nga nisja e pushtimit të plotë të Ukrainës në vitin 2022.
Qëllimi i bisedës ishte diskutimi i mundësive për negociata të ardhshme që do të ndihmonin në përfundimin e luftës në Ukrainë, kanë bërë të ditur zyrat e presidentit finlandez, Alexander Stubb, dhe kryeministrit norvegjez, Jonas Gahr Store. Ata theksuan se nisma nuk ishte ndërmarrë në emër të Evropës në tërësi.
Sipas kryeministrit norvegjez, biseda telefonike, e cila zgjati rreth 90 minuta dhe u zhvillua të martën nga kryeqyteti finlandez, Helsinki, nxori në pah dallime të mëdha në qëndrime.
Sipas zyrave të dy liderëve, biseda kishte për qëllim trajtimin e luftës së Rusisë kundër Ukrainës, përpjekjeve diplomatike për t’i dhënë fund konfliktit dhe promovimit të paqes e stabilitetit në Evropë.
Stubb e cilësoi bisedën si të drejtpërdrejtë dhe përmbajtësore, duke theksuar se rezultati i luftës do të ketë ndikim të drejtpërdrejtë në sigurinë e Finlandës, Norvegjisë dhe Evropës në tërësi.
Pas bisedës, Putini deklaroi se politikat “konfrontuese” të Bashkimit Evropian dhe NATO-s po e zgjasin luftën në Ukrainë.
Ndërkohë, presidenti ukrainas, Volodymyr Zelensky, ka biseduar me dy liderët nordikë pas kontaktit të tyre me Putinin. Javën e kaluar, Zelensky ishte takuar në Oslo me Stubbin, Storen dhe të dërguarin e posaçëm të Shteteve të Bashkuara, Steve Witkoff.
Lideri ukrainas i falënderoi homologët finlandezë dhe norvegjezë për “mbështetjen aktive” ndaj Ukrainës.