Расел Бренд негира све оптужбе за силовање и сексуални напад

Aktori dhe komediani britanik Russell Brand ka mohuar të gjitha akuzat për përdhunim dhe sulm seksual, gjatë dëshmisë së tij në gjykatën e Londrës, duke deklaruar se pretendimet kanë pasur pasoja shkatërruese në jetën e tij, ka shkruar agjencia e lajmeve Ассоциатед Пресс.

51-vjeçari u paraqit në Gjykatën e Southwarkut, i shoqëruar nga bashkëshortja e tij, Laura Gallacher, për të dëshmuar në mbrojtje të vetes.

Brand përballet me tri akuza për përdhunim, tri për sulm seksual dhe një për tentativë sulmi seksual. Ai i mohoi të gjitha akuzat dhe deklaroi se nuk kishte detyruar asnjërën prej gjashtë grave, që e akuzojnë, të kryente veprime kundër vullnetit të tyre.

“Pëlqimi është thelbësor, i domosdoshëm dhe i panegociueshëm. Në shumë aspekte, ai është edhe më i rëndësishëm se vetë seksi”, ka deklaruar Brand gjatë dëshmisë.

Ai ka thënë se akuzat i kishin kushtuar miqësi dhe marrëdhënie profesionale, ndërsa pretendoi se askush që mund të dëshmonte në favor të tij nuk kishte pranuar të paraqitej në gjykatë.

“E gjithë jeta ime është përpirë nga këto ngjarje, këto pretendime dhe këto akuza”, ka thënë ai, duke shtuar se përballja me këtë situatë traumatike kishte ndikuar edhe në martesën, marrëdhënien me fëmijët dhe shëndetin e tij.

Gjashtë gra e akuzojnë për abuzim seksual

Akuzat lidhen me ngjarje të pretenduara mes viteve 1999 dhe 2009. Gjatë gjyqit, gjashtë gra kanë dëshmuar për përvoja të ndryshme, përfshirë pretendime për përdhunim, prekje të padëshiruara dhe sjellje të tjera seksuale të papërshtatshme.

Prokurorja Riel Karmy-Jones e përshkroi Brandin si një person të pamëshirshëm dhe manipulues, duke deklaruar se, sipas prokurorisë, ai kishte vepruar si një grabitqar seksual.

Njëra nga gratë pretendon se është përdhunuar nga Brand në një hotel në vitin 1999. Të tjerat kanë ngritur akuza për ngjarje të pretenduara në Londër, në ambiente pune, bare dhe në banesën e aktorit, deri në vitin 2009.

Sipas prokurorisë, gratë nuk njiheshin me njëra-tjetrën dhe iu drejtuan policisë veçmas, pas publikimit të një dokumentari televiziv në vitin 2023.

Identitetet e tyre nuk bëhen publike, në përputhje me ligjin britanik që mbron përgjithmonë identitetin e personave që pretendojnë se kanë qenë viktima të dhunës seksuale.

Brand pranon sjelljen e tij të së kaluarës, por mohon krimet

Gjatë marrjes në pyetje, Brand ka pranuar se në rininë e tij kishte pasur një jetë seksuale të shfrenuar dhe se fama i kishte lehtësuar krijimin e marrëdhënieve seksuale.

“Ndërsa bëhesha më i suksesshëm dhe më i famshëm, isha shumë i gatshëm ta përdorja këtë për të pasur më lehtë qasje në marrëdhënie seksuale. E pranoj se kjo ishte e gabuar”, ka thënë ai.

Ai ka pranuar gjithashtu se kishte qenë i fiksuar pas seksit kur ishte më i ri, por mohoi se kishte qenë i dëshpëruar për të apo se nuk mund të funksiononte pa të.

Brand u bë i njohur në fillim të viteve 2000 për shfaqjet e tij komike, programet televizive dhe emisionin në BBC. Ai luajti edhe në filma të Hollywoodit, përfshirë “Forgetting Sarah Marshall” dhe “Get Him to the Greek”, si dhe ishte për një periudhë të shkurtër i martuar me këngëtaren Katy Perry.

Vitet e fundit, ai është larguar nga mediat tradicionale dhe ka krijuar një audiencë të madhe në internet, ku publikon përmbajtje mbi mirëqenien, teoritë konspirative dhe besimin fetar.

Në përfundim të dëshmisë, Brand përsëriti se i mohon të gjitha akuzat.

“Deklarohem i pafajshëm në secilën prej çështjeve”, ka përfunduar ai.