-
Traducido por: Vita Abrashi-Kajtazi
- 5 de noviembre de 2026 10:27
- Compartir a:
Paris Jackson ka ndërmarrë veprime ligjore për pasurinë e babait të saj, legjendës së muzikës Michael Jackson, duke kërkuar që 600 milionë dollarë të transferohen në një fond familjar për të dhe dy vëllezërit e saj, Prince dhe Bigi Jackson.
Sipas dokumenteve gjyqësore të siguruara nga E! News, në një kërkesë të paraqitur më 29 tetor, Paris pretendon se, ndonëse pasuria e të atit ka gjeneruar miliarda dollarë që nga vdekja e tij në vitin 2009, fëmijët nuk kanë përfituar ende fondet që ai i kishte parashikuar për ta.
Ajo i ka kërkuar një gjykate në Los Angeles që të urdhërojë transferimin e një pjese të pasurisë në fondin e njohur si “Michael Jackson Family Trust”, i krijuar për të garantuar sigurinë financiare të tre fëmijëve të këngëtarit.
Sipas kushteve të fondit, Paris dhe vëllezërit e saj duhej të fillonin të merrnin të ardhura nga pasuria e legjendës së muzikës pop, në moshën 21-vjeçare, ndërsa shuma të tjera do t’u shpërndaheshin kur të mbushnin 30, 35 dhe 40 vjeç.
Megjithatë, në dokumentet gjyqësore pretendohet se fondi familjar ende nuk është financuar. Paris gjithashtu pretendon se ajo dhe vëllezërit e saj varen financiarisht nga administratori i mbetur i pasurisë, John Branca, i cili vendos se sa para u jepen.
Në kërkesën e saj, ajo pretendon se ata marrin shuma më të vogla, të përcaktuara nga administratori, dhe se kjo mënyrë menaxhimi i pengon të kërkojnë llogari për vendimet e tij.
Nga ana tjetër, përfaqësuesit e pasurisë së Michael Jacksonit kanë deklaruar për revistën People se fondet nuk mund të transferohen plotësisht derisa të zgjidhen çështjet e tjera ligjore.
Mes tyre është edhe një proces gjyqësor me Shërbimin e të Ardhurave të Brendshme në SHBA (IRS), i cili ka kërkuar rreth 700 milionë dollarë për taksa dhe gjoba.
Michael Jackson ka vdekur në vitin 2009 dhe ka lënë pas tre fëmijë, Parisin, Princen dhe Bigin.