Koleksionisti miliarder, William “Bill” Koch, është gati të shesë më shumë nga veprat e tij të artit. Pasi në janar shiti veprat e artit amerikan me vlerë prej 84 milionë dollarësh në një ankand të organizuar nga “Christie’s”, ai po nxjerr në shitje një tjetër grup pikturash këtë nëntor, përfshirë vepra të Claude Monet dhe Paul Cezanne, secila prej të cilave mund të arrijë çmimin deri në 18 milionë dollarë.
“Christie’s” ka bërë të ditur se koleksioni, ku përfshihen edhe vepra të Edgar Degas, Henri Matisse, Joan Miró dhe Diego Rivera, pritet të sjellë më shumë se 40 milionë dollarë gjatë ankandeve të saj kryesore në New York muajin e ardhshëm.
Ky njoftim shënon kapitullin më të fundit të një marrëdhënieje që është dëshmuar mjaft fitimprurëse mes Koch-it dhe shtëpisë së ankandeve. Në qershor të vitit 2025, “Christie’s” shiti verëra me vlerë prej 28.8 milionë dollarësh nga bodrumi i tij, ndërsa shtatë muaj më vonë pasoi ankandi i veprave të tij të artit të Perëndimit Amerikan. Sipas “Christie’s”, të dyja shitjet i tejkaluan pritshmëritë.
Por, Koch nuk po shet vetëm vepra arti dhe verëra. Ai po përpiqet gjithashtu të gjejë një blerës për “Elk Mountain Lodge”, pronën e tij të gjerë prej 52 akrash në Aspen, Colorado. Prona doli në shitje në janar të vitit 2025, me çmim prej 125 milionë dollarësh, por, pasi nuk arriti të tërhiqte blerës, Koch e uli çmimin ndjeshëm, çmimin e kërkuar në 99 milionë dollarë dhe e nxori në ankand në korrik. Prona, të cilën ai e bleu për 26.5 milionë dollarë në vitin 2007, përfshin një shtëpi kryesore prej 16.631 metrash katrorë, shtatë kabina për mysafirë dhe aq shumë hapësira e shërbime, saqë largimi nga prona duket thuajse i panevojshëm.
Nuk është e qartë se çfarë qëndron pas vendimit të Koch-it për të shitur. Në më pak se dy vjet, 85-vjeçari është ndarë nga vepra arti dhe verëra me vlerë prej më shumë se 112 milionë dollarësh, ndërsa muajin e ardhshëm mund të realizojë edhe 40 milionë dollarë ose më shumë. Ndonëse duket se miliarderi po bën një pastrim të mirëfilltë të pronave dhe koleksioneve të tij, “Christie’s” nuk ka dhënë ndonjë shpjegim, ndërsa Koch nuk i ka lidhur publikisht shitjet me ndonjë plan më të gjerë. Megjithatë, në njoftimin për media, ai shprehet se shpreson që “dashamirësit e artit në mbarë botën të përjetojnë të njëjtin kënaqësi që kam përjetuar unë duke mbledhur këto vepra. Shpresoj që koleksionistët të gjejnë diçka që u flet pasionit të tyre dhe që të mund ta ndajnë atë me miqtë dhe njerëzit e tyre të dashur”.
Për ankandin e ardhshëm, Koch po e përqendron vëmendjen tek arti evropian dhe ai i Amerikës Latine. Në krye të grupit është piktura e Monet, “Champ d’avoine et coquelicots” (1890), një peizazh që paraqet një fushë me tërshërë dhe lulëkuqe pranë shtëpisë së artistit në Giverny, France. Koch e bleu pikturën në vitin 1985, ndërsa vlerësimi paraprak i çmimit të saj është nga 12 deri në 18 milionë dollarë.
Në të njëjtin nivel rëndësie është edhe vepra e Cézanne, “Tasse, verre et fruits”, një natyrë e qetë e realizuar rreth vitit 1877, ku paraqiten mollë, një filxhan dhe një gotë të vendosura mbi një tavolinë. Koch e bleu pikturën në vitin 1986, ndërsa “Christie’s” i ka caktuar të njëjtin vlerësim paraprak, nga 12 deri në 18 milionë dollarë. Të dyja pikturat do të përfshihen në ankandin “20th Century Evening Sale” të kësaj shtëpie ankandesh.
Një tjetër vepër e spikatur është “Jeune femme fardée à l’orientale” (La bayadère) e Matisse, një pikturë e vitit 1929 që paraqet një nudo të frymëzuar nga baleti klasik “La Bayadère”. Pritet që ajo të shitet për një shumë nga 5 deri në 7 milionë dollarë.
Vepra e Degas, “Scène de ballët” vlerësohet nga 3 deri në 5 milionë dollarë. Kjo vepër, e realizuar me pastel mbi monotipi, ka një histori veçanërisht interesante: fillimisht ishte blerë drejtpërdrejt nga Degas nga koleksionistja e Philadelphia, Annie Riddle Scott, me këshillën e piktores impresioniste, Mary Cassatt. Një tjetër kopje e së njëjtës monotipi bazë gjendet në koleksionin e “Clark Art Institute” në Williamstown, Massachusetts.
Koleksioni i Koch-it përfshin gjithashtu veprën “Vendedora de flores en Xochimilco” (1929) të Rivera dhe Peinture (1950) të Miró, secila e vlerësuar nga 2.5 deri në 3.5 milionë dollarë. Një pikturë e Chagall e vitit 1971, “Danseuse à la robe fleurie”, vlerësohet nga 1.2 deri në 1.8 milion dollarë, ndërsa “Kind mit Puppe” (1909) e Gabriele Münter pritet të shitet për një shumë nga 900 mijë deri në 1.2 milion dollarë.
Koch, industrialist, fitues i garës prestigjioze të lundrimit “America’s Cup” dhe koleksionist prej shumë vjetësh, ka kaluar dekada duke krijuar koleksione që përfshijnë gjithçka, nga artet e bukura deri te verërat e rralla. “Ndihem shumë me fat që, falë punës së palodhur, suksesit në biznes dhe një sasie të madhe fati, kam mundur të mbledh gjëra që kanë domethënie për mua”, ka thënë Koch në një deklaratë. “Kryeveprat e këtij ankandi janë ndër të preferuarat e mia”.
Veprat do të shpërndahen në tri ankande të “Christie’s”: “20th Century Evening Sale”, “Impressionist and Modern Art Day Sale” dhe “Works on Paper Sale”, të cilat do të mbahen gjatë javës së ankandeve kryesore të shtëpisë në New York, në nëntor.