Presidenti i nderit i Bayern Munchenit, Uli Hoeness, e ka vënë në pikëpyetje kthimin e mesfushorit Jamal Musiala në formën më të mirë të mundshme. Futbollisti është diagnostikuar me një problem neurologjik.
Musiala është pranë kthimit nga një lëndim, ndërsa kolapsoi dy herë në fushë gjatë muajit gusht. Ai ishte rrëzuar në fushë gjashtë minuta pas aktivizimit si zëvendësues në fitoren 4:2 të Bayernit ndaj Heidenheimit në miqësore.
Më vonë u njoftua se Musiala ka një problem neurologjik. Ylli gjerman theu këmbën në Kupën e Botës për Klube në vitin 2025 dhe për këtë arsye mungoi në gjysmën e edicionit të kaluar. U kthye në fillim të këtij viti.
Ai dështoi të shkëlqente te Gjermania në Kupën e Botës, pasi kampionia e katërfishtë u eliminua herët. Ndërkohë që nga shtatori është jashtë fushës për shkak të një lëndimi të hamstringut.
“Përballemi me dilemë për këtë rast. Ai po vuan nga një sëmurje që thjesht nuk mund të shërohet. Por mund të kontrollohet në një masë me përdorimin e barnave”, ka thënë Hoeness për transmetuesin bavarez, BR.
Ndonëse president nderi, Hoeness është personalitet me shumë ndikim te Bayerni.
“Por, a do të ketë ai të njëjtin potencial performance siç e kishte më parë... Imagjinoni sikur Bayerni tani të vinte në dyshim kontratën e tij dhe të thoshte se ajo që ai është në gjendje të ofrojë aktualisht, nuk përputhet më me atë që parashikohet në kontratë”.
Musiala është larg prej formës që e kishte deri në vitin e kaluar. Ai e fitoi “Këpucën e Artë” si një nga golashënuesit më të mirë në “Euro 2024”.
Për Lothar Matthaeusin, fjalët e Hoenessit janë një lloj presioni ndaj lojtarit. Matthaeus, si Hoeness, është prej legjendave gjermane.
"Uli po e ngacmon pak dhe po përpiqet t’i hyjë disi nën lëkurë. Është pjesë e procesit. Nuk bëhet fjalë vetëm për ta mbajtur atë në zonë komoditeti, por edhe për ta lejuar të përballet me pak vështirësi”, ka thënë Matthaeus për “Sky”.
“Me atë deklaratë, Uli u përpoq qëllimisht të provokonte një reagim. Sikur të isha në vendin e Jamalit, kjo do të ishte motivim i mjaftueshëm për t’i treguar Ulit se jam rikthyer. Do kjo do ta gëzonte Ulin”.