Çmimi Nobel në Mjekësi për këtë vit iu dha tre shkencëtarëve për kërkimet e tyre mbi mënyrën se si truri kontrollon aktivitetin e qelizave nervore.
Karl Deisseroth, Peter Hegemann dhe Georg Nagel janë vlerësuar për punën e tyre mbi kanalet jonike që aktivizohen nga drita dhe zhvillimin e optogjenetikës, një metodë që mundëson kontrollin e aktivitetit të qelizave nervore përmes dritës.
Deisseroth, 54 vjeç, punon në Universitetin Stanford në Kaliforni. Hegemann, 71 vjeç, është profesor në Universitetin Humboldt në Berlin, ndërsa Nagel, 73 vjeç, punon në Universitetin e Wurzburgut në Gjermani, raporton AP.
Komiteti Nobel vlerësoi rëndësinë e punës së tyre, duke theksuar se kjo metodë po përdoret tashmë në laboratorë në mbarë botën për të studiuar më nga afër funksionimin e trurit.
Sekretari i Komitetit për Mjekësi, Thomas Perlmann, tha se kishte arritur të kontaktonte të tre fituesit përmes telefonit, menjëherë pas shpalljes së çmimit.
Çmimi u shpall në Institutin Karolinska në Stokholm, duke shënuar nisjen e javës së Çmimeve Nobel.
Fituesit do të ndajnë një shpërblim prej 12 milionë koronash suedeze, rreth 1.2 milionë dollarë.
Vitin e kaluar, Çmimi Nobel në Mjekësi iu dha tre shkencëtarëve për kërkimet mbi sistemin imunitar.
Pas çmimit në Mjekësi, të martën do të shpallet fituesi i Nobelit në Fizikë, të mërkurën në Kimi dhe të enjten në Letërsi.
Të premten do të shpallet Çmimi Nobel për Paqe, ndërsa më 12 tetor do të bëhet i ditur fituesi i Çmimit Nobel në Shkencat Ekonomike.