Një përplasje në distancë është zhvilluar në mes të deputeteve të Lidhjes Demokratike të Kosovës, Hykmete Bajrami e Vjosa Osmani.
Bajrami në një status në Facebook iu ka referuar Osmanit si “turiste politike që ka mbetur pa pushtet e pa dinjitet”. Ajo e ka akuzuar Osmanin duke thënë se po shpërndan mjegull.
“Mos gënjeni! Në debatin e sotëm u dëgjuan shumë të pavërteta, prandaj disa gjëra duhet t'i sqarojmë. Në vitin 2020, kur ekonomia ishte komplet e mbyllur për shkak të pandemisë, Qeveria e Republikës së Kosovës ka financuar pagat e punëtorëve të sektorit privat për një muaj, nuk iu ka dhënë para ‘bosëve të biznesit’”, ka shkruar Bajrami.
Osmani në fjalën e saj në seancën e Kuvendit, duke akuzuar Qeverinë Kurti se veçse i kanë “ndërruar bossat e krimit” dhe se po “kontrollohen nga oligarkët”, ka folur për këtë pako të vitit 2020, duke thënë se ka qenë më kritikja për të për shkak se fondet u janë dhënë “bossave të biznesit”.
“Por çfarë të them unë kur kritikohemi për standarde të dyfishta e dëgjojmë nga ju standarde të dyfishta. Mbrojtje të dështimeve, arsyetim të stagnimeve e jo duke e parë veten në pasqyrë me qëllim për t’u përmirësuar. Çka thanë për humbjen e fondeve? Thanë që në vitin 2020 fonde iu kanë dhënë bossave të biznesit. Po. Dhe a e dini kush ka qenë personi që e ka kritikuar më së shumti në atë kohë në këtë Parlament? E kam kritikuar unë. E çka ka ndodhur në ndërkohë është se ju veç i keni ndërruar bossat e krimit, i keni ndërruar oligarkët”, ka thënë Osmani, raporton EO.
Kur është dhënë kjo pako kryeministër ka qenë Avdullah Hoti e ministre e Financave Hykmete Bajrami.
Bajrami ndër të tjera ka shkruar se për realizimin e asaj pakoje kanë punuar rreth 10 shërbyes civilë, përfshirë drejtorin e Thesarit dhe drejtorin e Buxhetit.
“Kriteri ka qenë i qartë: punëtorët duhej të figuronin në listën e pagave të ATK-së për tre muajt paraprakë. Ka qenë një nga pakot më transparente të mbështetjes financiare që janë realizuar ndonjëherë në historinë e shtetit të Kosovës. Disa edhe mund të ma shihni për të madhe që po merrem me njerëz që sot mohojnë edhe biografitë e tyre, të cilëve u vjen turp të pranojnë se pjesë e cilave institucione dhe shumica kanë qenë dikur. E sa për standarde të dyfishta, janë kampionë! Për ta, e njëjta gjë është e drejtë ose e gabuar, varësisht nga karrigia ku janë ulur”, ka shkruar Bajrami.
Ajo ka thënë se këtë ka pasur ta thotë në Kuvend por se nuk i është dhënë fjala.
