Sa herë që janë pyetur për gropat në rrugët e kryeqytetit, zyrtarë të Komunës së Prishtinës kanë thënë se kanë një kontratë kornizë për mbylljen e tyre.
Nga prilli ishte thënë se do të fillohej me mbylljen e gropave, por që atëherë gjendja në rrugët e kryeqytetit, nuk është përmirësuar, raporton emisioni 038 i KTV-së.
Pasqyrë e rrugëve të këqija të kryeqytetit janë shumë prej rrugëve në Lagjen e Spitalit.
Pos rrugës “Ernest Koliqi”, mjaft e dëmtuar është edhe rruga “Holger Petersen”, rrugë për të cilën kryetari i Komunës, Shpend Ahmeti në muajin maj e kishte fajësuar qeverisjen e kaluar.
E derisa kishte njoftuar se janë duke punuar në projektin e ri për këtë rrugë, kishte premtuar mbylljen e menjëhershme të tyre.
Shumë të hëna kanë kaluar nga kjo deklaratë e Ahmetit, por gropat nuk janë mbyllur, njësoj sikurse ato në rrugën “Richard Holbrooke”, e cila mban epitetin e rrugës më të dëmtuar në kryeqytet.
Pos kësaj pjese, gropat nuk mungojnë as në pjesë tjera të qytetit.
E derisa numri i gropave është shtuar, në anën tjetër është vërejtur rënie e intensitetit të punës nga drejtoria e infrastrukturës për mbylljen e tyre.