KQZ ka mënjanuar të gjitha paqartësitë lidhur me vendvotimin e shqiptarëve të Suhadollit dhe Lagjes së Doktorëve, që shtrihen në veri të lumit Ibër, në zgjedhjet e ardhshme.
Me vendimin që KQZ ka marrë në mbledhjen e mbajtur më 07.08.2017, drejtuar nga kryetarja Valdete Daka, banorët e lagjeve Suhadoll i Poshtëm, Suhadoll i Epërm dhe ata të Lagjes së Doktorëve, në zgjedhjet e ardhshme do të jenë në listat e votuesve të Komunës Mitrovica e Jugut, e jo në ato të Mitrovicës Veriore, siç kishte ndodhur në zgjedhjet e kaluara.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj Kontribuo“Në të vërtetë, KQZ këtë vendim e ka marrë pas kërkesës së vet banorëve-votuesve shqiptarë që jetojnë në lagjet e lartpërmendura në veri të lumit Ibër, si dhe të kërkesës së kryetarit të Komunës së Mitrovicës Jugore, Agim Bahtiri, pasi që këto lagje me Pakon e Presidentit Ahtisaari i takonin komunës Mitrovica Jugore e jo Komunës Mitrovica Veriore”, thuhet në njoftimin për media të Komunës së Mitrovicës Jugore.
Komuna e Mitrovicës Jugore në këtë njoftim thotë po ashtu se drejtuesit serbë të Komunës së Mitrovicës Veriore nuk e nënshkruanin dokumentin i cili përcakton vijën administrative ndarëse me komunën e Mitrovicës Jugore, duke kërkuar ndryshimin e pakos Ahtisaari lidhur me përcaktimin e kufijve administrativë midis dy komunave të Mitrovicës, me arsyetimin se Suhadolli i Poshtëm, Suhadolli i Epërm dhe Lagja e Doktorëve i takojnë Mitrovicës Veriore, pasi që një numër i madh i banorëve e këtyre lagjeve ishin futur në listat e votuesve të kësaj komune dhe kishin votuar për kandidatët për këshilltarë të Kuvendit të kësaj Komunës.
“Kryetari i Komunës Mitrovica Jugore, Agim Bahtiri nuk kishte pranuar në asnjë mënyrë që të ndryshohen kufijtë administrativë të caktuar me pakon e Presidentit Ahtisaari, andaj marrëveshja për përcaktimin kufijve administrativë midis dy komunave të Mitrovicës, ka mbetur ende pa u nënshkrua”, thuhet më tej në këtë njoftim.
Njoftimi po ashtu thotë se Bahtiri e ka mirëpritur vendimin e KQZ-së dhe i ka bërë ftesë kryetarit të Mitrovicës Veriore, Goran Rakiq që të ulen dhe të nënshkruajnë marrëveshjen për definimin e kufijve administrativë midis dy komunave, “pasi që tani më nuk ka asnjë çështje kontestuese lidhur me këtë”.
Komuna e Mitrovicës Jugore thotë më tej se lagjet Suhadoll i Poshtëm e Suhadoll i Epërm dhe Lagja e Doktorëve, në zgjedhjet e ardhshme do të votojnë në qendrën aktuale, ku kanë votuar edhe në zgjedhjet e kaluara, në paralelen e ndarë të Shkollës fillore “Aziz Sylejmani”, që si objekt menaxhohet nga Drejtoria e Arsimit të Komunës së Mitrovicës së Jugut, qendër kjo e votimit që tani e tutje do të mbajë kodin e Komunës së Mitrovicës Jugore.
Ndërkaq, për votuesit e lagjes së “Tre Rrokaqiejve” dhe asaj “7 Shtatori”, Komuna e Mitrovicës Jugore thotë se do të hapet një qendër e votimit afër këtyre dy lagjeve, në shtëpi private, e cila është identifikuar nga Komisioni Komunal i Zgjedhjeve të Mitrovicës së Veriut, që do të mbaj kodin zgjedhor të kësaj komune.