Pothuajse asnjë vit Rahoveci nuk shpëton nga dëmet e mëdha që u shkaktohen në shumë kultura, kryesisht në vreshtari, raporton KTV.
Dëmet nga të reshurat atmosferike arrijnë vlerën deri në pesë milionë për një vit, derisa vetëm javën e kaluar, nga breshëri pësuan dëme shumë hektarë, vreshta në vlerë prej një milion euro.
Mirsad Mazreku, i cili vetëm përmes kultivimit të rrushit dhe perimtarisë, mban 25 anëtarë të familjes, ka tre hektarë hardhie të dëmtuara 100 për qind.
Hallin më të madh e ka se aq shumë janë dëmtuar hardhitë, saqë rrezikon që edhe vitin e ardhshëm të mbetet pa rrush.
Thotë se i ka humbur vullneti, pasi që thotë se asnjë vit nuk është kompensuar për asnjë cent nga ana e Ministrisë së Bujqësisë.
Komisioni komunal tashmë është duke vlerësuar dëmet në terren dhe brenda pak ditësh pritet të dalë me të dhëna të sakta të dëmeve.
Edhe muaj më parë, shumë hektarë të vreshtarisë dhe kulturave të tjera në këtë komunë pësuan dëme të mëdha.