GSJP: Politikanët ka më pak gjasë të ndëshkohen me ligj

Sipas Indeksit të performancës së institucioneve të sundimit të ligjit ne Kosovë, që sot është publikuar nga Grupi për Studime Juridike dhe Politike, 52.8 për qind e qytetarëve mendojnë që personat me ndikim politik kanë më pak gjasa të ndëshkohen nga ligji, transmeton koha.net.

Sipas këtij indeksi, gjykatat janë institucionet që ndikohen më shumë nga politika. 75.6 për qind e mendojnë një gjë të tillë, pasuar nga prokuroria me 67.2 për qind.

Grupi për Studime Juridike dhe Politike po mban sot tryezën e diskutimit me temë “Sfidat në Sistemin e Drejtësisë: Pakënaqësia qytetare kundrejt punës së gjyqtarëve dhe prokurorëve. Ku qëndron problemi?”

Grupi për Studime Juridike dhe Politike (GLPS) organizoi sot Tryezën e Diskutimit me temë: “Sfidat në Sistemin e Drejtësisë: Pakënaqësia qytetare kundrejt punës së gjyqtarëve dhe prokurorëve. Ku qëndron problemi?” ku u diskutua lidhur me performancën dhe efikasitetin e sistemit gjyqësor dhe prokurorial në Kosovë, sfidat dhe vështirësitë e identifikuara në punën e gjyqtarëve dhe prokurorëve, si dhe pakënaqësinë dhe mosbesimin e qytetarëve kundrejt këtij sistemi.

Në fillim të tryezës, GLPS prezantoi botimin e dytë të Indeksit të Performancës së Sistemit të Drejtësisë në Kosovë (RoLPIK), i cili paraqet trendin e performancës dhe efikasitetin e punës së gjyqtarëve dhe prokurorëve. Gjithashtu, ky Indeks tregon dhe shkallën e kënaqshmërisë qytetare kundrejt institucioneve të drejtësisë në Kosovë.

Nga të dhënat e anketimit mbetet shqetësues fakti që 24.8% e qytetarëve të anketuar mendojnë se asnjë nga institucionet e sundimit të ligjit nuk janë në gjendje të kryejnë detyrat/përgjegjësitë e tyre në mënyrë të pavarur. Ky perceptim negativ i qytetarëve është rritur krahasuar me të dhënat e Qershorit 2016, ku vetëm 16.2 % mendonin se asnjë institucion nuk është i pavarur.

Gjithashtu, të dhënat e anketës tregojnë se 58.2% e të anketuarve mendojnë se personat me ndikim politik kanë më pak gjasa që të marrin ndëshkimin e duhur nga strukturat përkatëse ligjore. Perceptimi i qytetarëve ndaj institucioneve të drejtësisë, në veçanti gjyqësorit dhe prokurorisë mbetet negativ, sidomos në aspektin e luftës kundër korrupsionit.

Sa i përket mitmarrjes, të dhënat tregojnë se 43.4% e qytetarëve të anketuar mendojnë që punonjësit e institucioneve të sundimit të ligjit drejtpërdrejt kërkojnë ose pranojnë mito. Nga ta, 77.9% e tyre perceptojnë se gjykatat janë institucioni më i prekur nga mitmarrja, pasuar nga prokuroria me 69.4%, policia me 52.2% dhe EULEX-i me 31.3%.

Në vazhdim, vetëm 4.7% dhe 3.6% e qytetarëve e perceptojnë prokurorinë dhe gjykatat, përkatësisht, si institucione kompetente që e luftojnë korrupsionin në Kosovë. Nga ta, 48.6 % e qytetarëve se policia është institucioni më efektiv në luftimin e korrupsionit, mediat dhe Agjencia Kundër Korrupsionit, përkatësisht 19.1% dhe 14.4%. Kurse sa i perket raportimit të korrupsionit, 75.7% shprehen se janë të gatshëm të raportojnë dhe Institucioni ku do te raportonin eshte Policia 85.6%

Në vazhdim, panelistët theksuan se mungesa e stafit, numri i vogël i prokurorëve dhe gjyqtarëve në raport me lëndët e pranuara si dhe të trashëguara kanë ndikuar në vonesën e përmbylljes së lëndëve përkatëse. Gjithashtu, transparenca dhe llogaridhënia mbeten të metat kryesore të funksionimit të institucioneve të sundimit të ligjit, u tha ndër të tjera në këtë tryezë.

Në këtë tryezë ishin prezent përfaqësues nga të gjitha institucionet e drejtësisë, prokuroritë dhe gjykatat rajonale të Kosovës, përfaqësues të komunitetit ndërkombëtar dhe shoqërisë civile.