Monitoruesi i punës së Kuvendit të Kosovës, Albert Krasniqi nga KDI, ka marrë një shembull nga Senati Amerikan, për të “propozuar” zgjidhjen e krizës politike në vend.
Është ndalur te një sekuencë nga seria “House of Cards” ku senatorët detyrohen të marrin pjesë në seancë për të siguruar kuorumin.
“Një veprim i ngjashëm ka ndodhur edhe në të vërtetë. Në shkurt të vitit 1988, policia e Senatit Amerikan kishte sjellë në këtë mënyrë senatorin Bob Packwood në seancë. Kjo ndodhi pasi Senati kishte urdhëruar arrestimin e senatorëve që mungonin dhe pamundësonin mbajtjen e seancës”, ka shkruar Krasniqi në profilin e tij në Facebook.
“Ilaç i mirë kishte qenë edhe për Kuvendin e Kosovës”, ka shtuar më pas ai.
Kujtojmë se në bazë të Kushtetutës, propozimi për kryetar të Kuvendit i takon subjektit i cili ka marrë më së shumti vota në zgjedhje. Në zgjedhjet e 11 qershorit i pari ka dalë koalicioni PAN, por që në mungesë të votave të nevojshme për të zgjedhur kryetarin e Kuvendit po bojkoton seancat.