Çfarë po ndodh me pushuesit kosovarë në Durrës?! Foto: Ilustrim

Çfarë po ndodh me pushuesit kosovarë në Durrës?!

16 korrik 2017 12:43

Rruga e plazhit në qytetin e Durrësit si duket është kthyer në bllokadë për turistët nga Kosova.

Portali i këtij qyteti, “Durreslajm.al”, ka raportuar ditëve të fundit për pengesat që po u bëhen operatorëve turistikë nga Kosova.

Sipas këtij portali, të gjithë autobusët tjerë lejohen të hyjnë e të ndalojnë në rrugën e plazhit, mirëpo autobusëve me turistë nga Kosova u është ndaluar qarkullimi dhe ndalimi në këtë rrugë, e madje ata edhe po gjobiten.

Portali ka hasur në një autobus me targa të Bosnjës i cili qarkullon lirshëm në këtë rrugë.

Më poshtë ju sjellim disa artikuj të portalit “Durreslajm” në lidhje me këtë temë:

***

Çfarë po ndodh në të vërtetë në plazhin e Durrësit?!

Kryetari i bashkisë së Durrësit Vangjush Dako, është njeriu më i dashur sot nga të gjithë durrsakët. Me votë absolute në krahasim me kundërshtarët e tij, Dakos, durrsakët i kanë besuar për tre herë radhazi votën e tyre, që ndryshe përkthehet: “besim”. Ky besim absolut ndaj tij u tregua edhe në zgjedhjet e 25 Qershorit, ku sërish durrsakët të shumtë në numër i besuan atij si drejtuesi politik i zgjedhjeve. Kjo do të thotë që durrsakët besojnë te Dako, në vendimet që ai merr në emër të qytetarëve të tij, të cilët i udhëheq prej tri mandatesh.

Por kryebashkiaku nuk do të jetë vënë në dijeni të një vendimi që zbaton policia e qarkullimit rrugor, duke mos lejuar këmbë kosovari të hyjë në plazhin e Durrësit.

Policia e qarkullimit rrugor u ka ngritur “traun” të gjithë autobusëve nga Kosova duke mos lejuar hyrjen e asnjë prej tyre në plazhin e Durrësit prej një jave.

Prej një jave, ajo që nuk pritej nga askush ka ndodhur. Asnjë autobus me pushues që ka destinacion plazhin e Durrësit, dhe që tradicionalisht kanë pasur stacionet e tyre të qëndrimit në Teuta, Apollonia, Hekurudha, Rrota e Kuqe, nuk lejohet më të qarkullojë në rrugën e plazhit.

Nuk dihet se kush e ka dhënë këtë urdhër absurd, të pa precedentë, e pa u konsultuar as me operatorët turistikë e as me agjencitë turistike që sjellin turistët në Durrës.

autobusëve me turistë u është dhënë leja që t’i zbresin në Plepa, apo tek Ura e Dajlanit, njerëzit që na vijnë me pushime, dhe më pas të hipin në autobusët urbanë. Kjo është ide e mirë për të shmangur trafikun që mund të krijohet, fjala bie gjatë zbritjes apo hipjes në autobusë në zonën e plazhit, por ata që vijnë për pushime janë me fëmijë të vegjël, të moshuar e me valixhe, e vijnë nga një rrugë e gjatë. Në autobusët urbanë të plazhit, njerëzit shtypen e bëhen sallatë nga vapa e masa e madhe e njerëzve.

Por situata është edhe më e rëndë, sepse sipas agjencive turistike të Shqipërisë e Kosovës, pas këtij vendimi skandaloz janë të përfshirë njerëz mafiozë, që nuk duan të vijnë në Durrës pushuesit, por të shkojnë në Lezhë apo edhe në qytete të tjera.

Bllokimi i autobusëve me pushues të cilët nuk lejohen të hyjnë fare në rrugën e re të plazhit “Pavarësia” ka ndikuar drejtpërsëdrejti tek të gjithë operatorët nga njësitë akomoduese deri te misrapjekësi.

Hotelet në rrugën e plazhit nuk kanë pushues, as banesat që jepen me qira këtë vit i kanë dhomat bosh.

Bosh janë restorantet, kafenetë, pikat e tregtisë me pakicë kanë xhiro minimale, bosh janë shezlongët, madje edhe shitësit e misrave e kanë qymyrin pa djegur. Kujt i intereson kjo situatë? Kush fshihet pas kësaj situate?

Pse në plazhin e Durrësit nuk lejohet më asnjë autobus të sjellë pushues në pikun e sezonit veror? Për çfarë po ndodh kjo? Kush po favorizohet? Kujt i shërben që plazhi i Durrësit të falimentojë? Asnjë durrsaku të ndershëm, nuk i intereson të falimentojë punën në qytetin e vet!

Plazhin e Durrësit deri tani e kanë mbajtur “patriotët” e Kosovës dhe të Maqedonisë, sepse pushuesit vendas e kanë braktisur me kohë.

Do të ishte mirë që kreu i bashkisë së Durrësit, si qytetar i parë, dhe shumë i vlerësuar nga i gjithë populli durrsak, prej hotelierëve dhe misrapjekësve, të merrte masa ndaj vartësve të tij, që lëshojnë urdhra të tillë, apo që neglizhojnë të bëjnë detyrën e tyre.

***

Në plazhin e Durrësit lejohet gjithçka, përveç kosovarëve!

Të gjitha kafshët që vijnë nga fshatrat, gomerë e kuaj të ngarkuar me qepë, domate e bostanë, lejohen të hyjnë në plazhin e Durrësit. Madje deri në rërë, aty ku lahen pushuesit lejohen.

Në plazh lejohen edhe kafshët e tjera të hyjnë e të shëtisin që prej arinjve, kërriçave, qenve e çdo lloji tjetër.

Në plazh lejohen të hyjnë edhe autobusët me turistë të huaj. Ky është një prej autobusëve të mbërritur nga Bosnjë-Hercegovina që përshkon tej e përtej rrugën “Pavarësia”.

Në plazh ka vend për të gjithë kafshët dhe turistët, por vend për kosovarët nuk ka.

***

Polici nga Kosova: Ja si po trajtohen kosovarët nga policia në Durrës!

Prej 17 vjetësh, Asim Aziri, është punonjës policie në Prishtinë. Po kaq vjet ka që për çdo vit ai dhe 50 anëtarë të familjes së tij të madhe kalojnë pushimet verore në plazhin e Durrësit.

Aziri, bashkëshortja dhe tre fëmijët e tij të mitur, mbërritën në plazh 2 ditë më parë. Autobusi me të cilin mbërritën nuk u lejua të hyjë në rrugën “Pavarësia”.

“U keqtrajtuam nga shteti nënë, u keqtrajtuam ne që vijmë dhe bëjmë pushime këtu. Përveç kosovarëve, asnjë pushues tjetër nuk është penguar të hyjë në plazh. Vitin tjetër do të shkojmë në Ulqin, nuk do të vijmë më në Durrës, pas kësaj që na bënë këtë vit”, shprehet Asimi, i cili përveçse është shumë patriot, është edhe shumë atdhedashës.

“Policia e Shqipërisë nuk ka solli asnjë pengesë nga kufiri deri në Durrës, por këtu tek Ura e Dajlanit nuk na lejuan të hynim. Na dërguan në Plepa, edhe atje nuk na lejuan të hynim në plazh. Me fëmijë të vegjël, me çanta e me valixhe, na bëjnë këtë keqtrajtim”, thotë Arsimi.

Punonjësi i policisë shprehet se si rezultat i kësaj gjendjeje, plazhi në Durrës është bosh. Njerëzit tanë nga Kosova nuk do të vijnë në Durrës. Prej ditësh që ndodh kjo gjendje nuk po vijnë më dhe kjo duket që plazhi këtë verë është bosh.

***

Skandal në plazhin e Durrësit, policia u ngre traun pushuesve nga Kosova

Komentet

Shto koment

Të ngjashme