Deputeti i zgjedhur i Vetëvendosjes në zgjedhjet e fundit parlamentare të vendit, Frashër Krasniqi, në një postim të vetin në Facebook, është ankuar në ato që ai i ka quajtur mosinteresim i Gjykatës për gjendjen tij shëndetësore.
Gjendje e tij shëndetësore, sipas Krasniqit, është pasojë e mos aktivitetit që i pamundësohet për shkak të ndalesave me masën e arrestit shtëpiak që ai e quan izolim.
Sipas Krasniqit, ”vazhdimi i izolimit çdo dy muaj, tash e 1 vit - pa asnjë interesim nga gjykata rreth gjendjes tonë fizike e shëndetësore - tregon për një sistem drejtësie ku nuk ka njerëz e humanitet por vetëm procedura, montime e shkelje”.
Ky është postimi i plotë i Krasniqit:
“Pasi nga vizita e fundit mjekësore, doli që kam probleme shëndetësore që vijnë nga mungesa e aktivitetit fizik dhe ekspozimit ndaj diellit, nesër në mëngjes e kisha të caktuar për të bërë analizat e mëtutjeshme.
Por, gjykatësi Beqir Kalludra nuk më ka dhënë leje, ani pse kërkesa është bërë në kohë të duhur, të mjaftueshme për përgjigjen e gjykatës.
Unë nuk e di a është kjo neglizhencë apo refuzim i qëllimshëm, por cilido qoftë rasti, kjo flet se për Beqir Kalludrën ne jemi thjeshtë emra në shkresa gjyqësore dhe jo njerëz që kanë nevojë të lëvizin e të mirëmbajnë shëndetin.
Vazhdimi i izolimit tonë, çdo dy muaj, tash e 1 vit - pa asnjë interesim nga gjykata rreth gjendjes tonë fizike e shëndetësore - tregon për një sistem drejtësie ku nuk ka njerëz e humanitet por vetëm procedura, montime e shkelje.