Kryesuesi i sekretariatit të PZAP-së, Mulë Desku, nuk ka përjashtuar mundësinë që rinumërimi i 117 kutive, pas vendimit të marrë sot nga PZAP, të sjellë ndryshime në listën e deputetëve.
Megjithatë, ai nuk ka paragjykuar se çfarë mund të ndodhë duke thënë se rinumërimi nuk është i gjithi për listën e kandidatëve. Ka thënë se ka pasur ankesa edhe për rinumërim për të gjitha subjektet dhe të gjithë kandidatët.
“Një numër i caktuar i kutive do të rinumërohen, sipas urdhrit, për të gjitha subjektet dhe kandidatët, por ka edhe urdhër që të bëhet numërimi i vetëm një subjekti politik apo i një kandidati që thotë se nuk i janë numëruar votat. Mund të ketë ndryshime”, ka thënë ai.
Sa i përket afatit se kur do të përfundojë ky proces i rinumërimit Desku në Interaktiv të KTV-së ka thënë se kjo mund të ndodhë edhe brenda ditës. Sa i përket certifikimit ka thënë se nuk pret që të ketë më ankesa dhe që gjithçka të përmbyllet brenda kësaj jave.