Kurti falënderon qytetarët që nuk lejuan që “drama kosovare e shtetit të kapur të mos ketë fund tragjik” Foto: Alban Bujari / Koha

Kurti falënderon qytetarët që nuk lejuan që “drama kosovare e shtetit të kapur të mos ketë fund tragjik”

07 October 2019 10:43

Kryetari i Lëvizjes Vetëvendosje, Albin Kurti ka deklaruar se qytetarët folën me votën e tyre dhe ata ndërhynë masivisht në skenën politike në mënyrë që drama kosovare e shtetit të kapur të mos ketë fund tragjik.

Ai, duke falënderuar qytetarët, ka thënë se ndryshimi ndodhi, ndërsa, tash duhet punuar bashkë me popullin.

“Prej mbrëmë ka shpresë. Sepse dje pati guxim. Ju votuat masivisht duke bërë që opozita e deridjeshme të korrë fitore bindëse. Ndryshimi ndodhi. Dhe, jo vetëm kaq. Populli vendosi që këtij ndryshimi i prin dhe do t’i prijë Lëvizja Vetëvendosje. Të gjithë ju që keni votuar dje u jam falënderues që keni kryer detyrën qytetare e obligimin demokratik në një kohë të vështirë siç është kjo që po kalojmë dhe në një vend të dashur siç është Kosova jonë. Të gjithë ju që keni votuar për ndryshimin, e sidomos për Vetëvendosjen, u jam mirënjohës për vetëdijen e lartë dhe ndërgjegjen e thellë për ta shpëtuar republikën tonë nga zvetënimi i mëtutjeshëm”, ka shkruar Kurti në Facebook.

Tutje ai tha se qytetarët folën me votën e tyre duke ndërhyrë masivisht në skenën politike në mënyrë që “drama kosovare e shtetit të kapur të mos ketë fund tragjik”.

“Urtësia e popullit tonë në çastet vendimtare ishte asgjë më pak sesa fantastike”.

“Tash, ne duhet të punojmë. Ama sërish bashkë me qytetarët. Kurrë anash apo prapa qytetarëve. Bashkë, gjithnjë. Punët e vështira që na presin vetëm sa ma shtojnë vullnetin. Ato nuk kanë llogari me neve, me juve, me mua. Sepse: Erdhi dita! Ju falemnderit të gjithëve dhe secilit”, ka përfunduar Kurti.

Lëvizja Vetëvendosje është duke prirë në numërimin e votave nga KQZ-ja në raport me LDK-në me mbi 6 mijë vota kur janë numëruar 96,94%.

© KOHA. Të gjitha të drejtat janë të rezervuara.

Komentet

Idoli IM 07/10/2019 14:20

Fitoi idoili IM me ne fund

Shto koment

Të ngjashme