Nis mësimi në distancë - videot në televizionin publik, fillimisht për klasat 1-5

23 March 2020 19:06

Me vëmendje po e ndjek në ekran poezinë “Pranvera” të poetit “Esat Mekuli”, të cilën po e lexon mësuesja Mrika Kllokoqi.

Kjo nxënëse e klasës së 4-të bashkë me nxënësit e klasave 1 deri në të 5-n, nga e hëna kanë nisur mësimin nga distanca. Mësimet po shfaqen në RTK 1 dhe RTK 4.

Ministria e Arsimit ka njoftuar se shumë shpejt këto materiale do të jenë edhe në uebfaqen e-mësimi, në të cilën është duke u punuar, raporton KOHA.

Njohësi i çështjeve të arsimit, Rinor Qehaja vlerëson se mësimi nga distanca është hap i mirë, megjithëse thotë se mund të ketë disa sfida.

Për mësimin e shfaqur në ekran, gjatë ditës prindërit kanë dhënë disa vërejtje teknike si, madhësinë jo të duhur të shkronjave në tekstet e shfaqura në ekrane e shfletim të shpejtë të detyrave të shtëpisë. Në lidhje me këto ankesa, zyrtarë të MASHT-it nuk janë përgjigjur.

Kryetari i Këshillit të Prindërve të Kosovës, Ymret Reshiti e ka quajtur të qëlluar iniciativën derisa ka kërkuar vëmendje më të madhe nga prindërit në realizimin e këtij procesi.

Edhe kryeministri Albin Kurti përmes një postimi në Facebook u ka kërkuar prindërve që t’i ulin fëmijët e tyre para televizorit çdo ditë nga ora 11:15.

Ai ka shtuar se ky është edhe një rast që të gjithë si shoqëri të marrin pjesë në arsim e edukim si asnjëherë më parë në Kosovën e pasluftës.

Gjatë kësaj jave pritet të nisin xhirimet për mësimet e klasave të 6 deri në të 9 e më pas edhe për shkollat e mesme.

Dy javë më parë, Qeveria mori vendim që të pezullojë mësimin deri më 27 mars si masë mbrojtëse kundër Koronavirusit.

© KOHA. Të gjitha të drejtat janë të rezervuara.

Të ngjashme