Porosia e Haradinajt për Hamzën që refuzon rritjen e pagës: “Le të bëhet burrë i mirë”

22 qershor 2018 19:10

Shefi i Buxhetit të Kosovës, Bedri Hamza, po e sfidon shefin e tij.

Ai ka vendosur ta refuzojë marrjen e pagës me rritje, raporton KTV.

Një javë pasi kishte votuar kundër vendimit të Qeverisë, i cili fuqizonte vendimin e dyfishimit të pagave për kabinetin Qeverisës, Hamza nuk ka pranuar të marrë pagën me rritje e as retroaktivitetin e saj, vendim të cilin e kanë ndjekur edhe këshilltarët e tij.

Vendimi i tij nuk ka kaluar pa komentin e kryeministrit, i cili me cinizëm ka thënë se ministri i Financave, Bedri Hamza, në takimet zyrtare ishte shprehur i gatshëm të zbatonte vendimin e Kushtetueses.

Madje, ai ka thënë se po që se ai do të jetë burrë më i mirë, le të ndihmojë me përfundimin e Ligjit për Pagat.

Kryeministri ka komentuar edhe paralajmërimet e Presidentit Hashim Thaçi për demarkimin e kufirit me Serbinë, për çka ka kërkuar kujdes gjatë dialogut që duhet trajtuar me seriozitetin më të madh.

Ndryshe, Qeveria e Kosovës ka miratuar kërkesën e Komunës së Rahovecit për krijimin e “Zonës Ekonomike” në Rahovec.

Me vendimin e aprovuar nga kabineti qeveritar, është miratuar edhe kërkesa e Komunës së Leposaviqit, për çështjen e 211 punonjësve të Komunës, të cilët kanë qenë në listën e pagave dhe të cilët janë financuar nga buxheti i veçantë i Qeverisë, para nënshkrimit të Marrëveshjes së Brukselit të vitit 2013.

© KOHA. Të gjitha të drejtat janë të rezervuara.

Të ngjashme