Aktorja 29-vjeçare Maisie Williams, e cila u bë e famshme në moshën 13-vjeçare me rolin e Arya Stark në “Game of Thrones”, ka rrëfyer për periudhën e vështirë që kaloi pas përfundimit të serialit në vitin 2019. Ajo tha se gjysma e parë e të 20-ave ishte “ferr”, pasi nuk e dinte se çfarë do të bënte më pas dhe po përpiqej të kuptonte më mirë edhe fëmijërinë e saj, ndërsa përmendi gjithashtu pandeminë e COVID-19 dhe grevat në industrinë e filmit.
Williams, e cila u nda nga stilisti Reuben Selby në shkurt të vitit 2023, tha se jeta e saj është përmirësuar ndjeshëm që atëherë. Ajo u largua nga Londra, nisi të jetonte vetëm, u rikthye te qeni i saj dhe filloi t’i jepte më shumë rëndësi vetes. “Në atë pikë, ishte koha të zgjidhja veten”, tha aktorja, duke shtuar se tre vitet e fundit kanë qenë shumë më të mira për të.
Ajo tregoi se jeta e saj e re është shoqëruar me më shumë qetësi dhe aktivitete që i pëlqejnë, përfshirë leximin, shkrimin, jogën, vrapin, notin, çiklizmin dhe shëtitjet e gjata me qenin. Sipas saj, kjo mënyrë jetese e ka ndihmuar të kuptojë më mirë se çfarë dëshiron, qoftë një fundjavë me miqtë, një darkë spontane në Londër apo edhe të shkojë vetëm në kinema.
Aktualisht, Williams është në një lidhje të re dhe thotë se është “shumë e lumtur”, por ka zgjedhur të mos zbulojë identitetin e partnerit të saj. Kur u pyet nëse është duke njohur njerëz të ndryshëm, ajo u përgjigj: “Jo! Jam e dashuruar. Kaq do të them.” E pyetur nëse kjo lidhje është ndryshe nga ato të mëparshmet, aktorja tha se po, duke shtuar se një nga gjërat më të bukura është se “ka shumë të qeshura”.