Kosova e Hungaria kanë thelluar bashkëpunimin në fushën e bibliotekave. Biblioteka Kombëtare Széchényi e Hungarisë dhe Biblioteka Kombëtare e Kosovës “Pjetër Bogdani” kanë nënshkruar memorandum mirëkuptimi “me qëllim të forcimit të bashkëpunimit përmes projekteve të përbashkëta kulturore, shkëmbimit të stafit dhe trajnimeve profesionale në fushën e digjitalizimit”.
“Ky bashkëpunim u bë i mundur falë angazhimit të Ambasadorit të Republikës së Kosovës në Hungari, z. Delfin Pllana, të cilin e falënderojmë për iniciativën dhe mbështetjen në realizimin e këtij bashkëpunimi dhe kësaj vizite, shkruhet në komunikatën për media të BKK-së, në të cilën njoftohet se memorandumi është nënshkruar nga drejtoresha e përgjithshme e Bibliotekës Kombëtare të Kosovës, dr. Blerina Rogova- Gaxha dhe drejtoresha e përgjithshme e Bibliotekës Kombëtare Széchényi, znj. Judit Gerencsér.
“Në takim, përveç përfaqësuesve të dy institucioneve, morën pjesë edhe sekretari i Ministrisë së Kulturës në Kosovë, z. Bislim Bislimi, si dhe përfaqësues nga Ministria e Punëve të Jashtme të Hungarisë. Gjatë vizitës, delegacioni pati mundësinë të njihet nga afër me punën e institucionit, shërbimet për përdoruesit, proceset e digjitalizimit, si dhe mënyrat e ruajtjes së koleksioneve bibliotekare”, shkruhet në komunikatë.
Nënshkrimi i memorandumit është cilësuar si një hap i rëndësishëm drejt forcimit të bashkëpunimit mes dy bibliotekave dhe zhvillimit të lidhjeve kulturore mes Kosovës dhe Hungarisë.
Biblioteka Kombëtare Széchényi (Országos Széchényi Könyvtár) është biblioteka kombëtare e Hungarisë dhe një nga institucionet më të rëndësishme për ruajtjen e historisë, gjuhës dhe kulturës hungareze. Ajo ndodhet në Pallatin e Kështjellës së Budës, në Budapest. Ka një traditë prej vitit 1802 kur konti hungarez Ferenc Széchényi – emri e të cilit e mban biblioteka – dhuroi koleksionin e tij të librave dhe dokumenteve të kombit hungarez. Ai kishte mbledhur libra e botime që lidhen me Hungarinë, përfshirë vepra të gjetura jashtë vendit.