Biznesmeni i njohur bullgar dhe presidenti i klubit të futbollit Botev Plovdiv, Iliyan Filipov, është vrarë në qytetin e Plovdivit, raportojnë mediat lokale.
Filipov, pronar i një prej kompanive më të mëdha të transportit dhe logjistikës në Bullgari, PIMK, dhe aksionari kryesor i Botev Plovdivit, është qëlluar për vdekje rreth orës 01:00 të së mërkurës, në një pronë të tij në qytet.
Pas incidentit, policia ka bllokuar hyrjet dhe daljet kryesore të Plovdivit, qytet që ndodhet rreth 145 kilometra në juglindje të kryeqytetit bullgar, Sofjes.
“Po ndjekim në mënyrë aktive të gjitha pistat e mundshme”, ka thënë në një konferencë të shkurtër prokurorja e Qarkut të Plovdivit, Vanya Hristeva.