Futbollisti i klubit të Bosnjë-Hercegovinës, Sarajevo, Francis Kyeremeh, u kritikua ashpër pasi postoi një fotografi në rrjetet sociale në të cilën shihej duke ngritur tre gishta.
Gjesti i ganezit u kritikua nga tifozët e ekipit. Ganezi më pas u detyrua të kërkonte falje dhe të sqaronte se nuk e dinte se çfarë do të thoshte.
“Tre gishtat” janë simbol që e bëjnë kryesisht serbët.
“Dua t’u drejtohem të gjithë tifozëve të Sarajevës. Më vjen keq për postimin dhe për gjithçka që mund të ketë shkaktuar. Nuk e dija se çfarë domethënie kishte gjesti apo çfarë mesazhi mbante. Nëse do ta dija, sigurisht që nuk do ta kisha bërë kurrë”, ka shkruar 29-vjeçari. “Si lojtar i Sarajevës, jam i vetëdijshëm për përgjegjësinë që mbaj ndaj klubit dhe tifozëve tanë. Më vjen keq nëse me veprimet e mia kam lënduar ose zhgënjyer dikë”.
Ai e filloi karrierën në Ganë, ndërsa nga viti 2015 deri në vitin 2019 luajti për klube serbe.