-
İtibaren:
BBC
- 6 Ekim 2026 11:11
- Şurada paylaş:
Pauza e parë gjatë edicionit 2026/2027 për ndeshje ndërkombëtare përfundon së shpejti. Dhe ajo ishte më e gjatë se sa janë mësuar tifozët e futbollit. Për herë të parë kampionatet e mëdha, por edhe të tjerat, u ndërprenë për tri javë në vend të dy javëve të zakonshme. Ligat e mëdha evropiane vazhdojnë të premten.
Ideja u prezantua nga FIFA duke pasur parasysh mirëqenien e lojtarëve, por marrë për bazë listën e gjatë të lojtarëve të lënduar, a ishte periudha e zgjatur e ndeshjeve ndërkombëtare vërtetë sukses?
Kush përfiton nga periudha e zgjatur e ndeshjeve ndërkombëtare? Dhe a duan njerëzit një pauzë prej tri javësh nga futbolli i klubeve, kur edicioni vetëm sa ka nisur?
Pse u vendos për periudhë të zgjatur?
Vitet e fundit FIFA ka përdorur pesë periudha kryesore ndërkombëtare gjatë edicionit. Të gjitha ishin prej dy javësh, në mars, qershor, shtator, tetor e nëntor.
Kalimi në një periudhë prej tri javësh në fund të shtatorit dhe fillim të tetorit, krahas reduktimit të periudhave ndërkombëtare në katër, u bë për disa arsye.
Njëra prej tyre ishte që finalja e Kupës së Botës u luajt vetëm më 19 korrik, që është data më e vonshme që nga Botërori 1966.
Mirëqenia e lojtarëve ishte gjithashtu pjesë e diskutimeve. Janë përfshirë edhe aspektet që lidhen me udhëtimet.
Reduktimi i numrit të periudhave ndërkombëtare do të ulë numrin e udhëtimeve që një pjesë e lojtarëve duhet të bëjnë nga njëri kontinent në tjetrin. Për shembull lojtarët afrikanë dhe ata të Amerikës së Jugut, që luajnë futboll në klubet evropiane.
Por kur edicioni i ligave vetëm sa ka filluar, tifozët shpesh ankohen për ndërprerjen dhe mezi presin kthimin e futbollit të klubeve.
YARALANMA
Mirëqenia e lojtarëve mund të jetë menduar kur u vendos për periudhë më të gjatë të ndeshjeve ndërkombëtare, por realiteti është që shumë lojtarë po kthehen të lënduar në klubet e tyre.
Është e vështirë të përcaktohet nëse ka më shumë lëndime gjatë grumbullimit të fundit të përfaqësueseve, në krahasim me grumbullimet e kaluara. Duhet të merret në konsideratë që ky ishte pushim më i gjatë dhe kishte më shumë ndeshje. Në Evropë u luajtën katër xhiro të Ligës së Kombeve, si asnjëherë më parë.
Por është fakt që kishte shumë lëndime prej se lojtarët u bashkuan me përfaqësueset e tyre. Janë lënduar edhe emra të njohur të futbollit evropian dhe lojtarë të rëndësishëm të klubeve më të mëdha.
Një pjesë e tyre janë kthyer në klube ende pa përfunduar grumbullimi me përfaqësuese, për të vazhduar fazën e rikuperimit.
Erling Haaland i Manchester Cityt është njëri prej lojtarëve të mëdhenj që pësoi lëndim.
Pas lëndimit të Haalandit reagoi sindikata e lojtarëve norvegjezë.
“Me kalimin e kohës, kemi parë një trend shqetësues ku barra mbi lojtarët kryesore është bërë shumë e madhe”, kanë thënë nga kjo sindikatë.
Kylian Mbappe po ashtu u largua herët nga grumbullimi i Francës për shkak të një lëndimi. Raphinha po ashtu la Brazilin dhe u kthye te Barcelona. Lista është e gjatë.
Disa lojtarë kanë luajtur me dhimbje në kërkim të suksesit me përfaqësueset e shteteve të tyre.
Përzgjedhësi i Anglisë, Thomas Tuchel, kishte kritikuar më herët periudhën trijavore. E cilësoi atë më sfiduese krahasuar me periudhat e kaluara, që ishin prej dy javësh.
Tuchel megjithatë vlerëson edhe anët pozitive, siç është qëndrimi më i gjatë i ekipit së bashku.
“Ekipi qëndron së bashku për kohë më të gjatë. Ka më shumë stërvitje, më shumë takime, dhe më shumë komunikim në të njëjtën gjuhë. Vihen re përmirësime dhe mekanizma loje që fillojnë të funksionojnë natyrshëm. Ky kamp ishte përvojë shumë e mirë”, ka theksuar Tuchel.