Votuesit në Zvicër po vendosin për një propozim që synon të forcojë neutralitetin e njohur të vendit.
Referendumi mbështetet nga një parti populiste e krahut të djathtë, e cila këmbëngul se qeveria zvicerane është afruar tepër me Bashkimin Evropian dhe NATO-n, veçanërisht në lidhje me luftën e Rusisë në Ukrainë.
Mbështetësit e planit, të promovuar nga Partia Popullore Zvicerane, duan që Zvicra të forcojë angazhimin e saj ndaj neutralitetit, një parim i sanksionuar në kushtetutë që nga mesi i shekullit të 19-të dhe që ka qenë objekt debatesh të gjata mbi kuptimin e tij të vërtetë.
Partia, e cila zotëron numrin më të madh të vendeve në parlament dhe numëron disa anëtarë me prirje pro-ruse, ka shprehur pakënaqësi të thellë për vendimin e qeverisë federale zvicerane për t'iu bashkuar sanksioneve të BE-së kundër Rusisë, për shkak të asaj që qeveria e quan "luftë agresioni" të Rusisë ndaj Ukrainës.
Kjo masë do ta ndalonte qeverinë t'u bashkohej sanksioneve kundër çdo vendi ndërluftues, me përjashtim të sanksioneve të miratuara nga Kombet e Bashkuara.
Rusia gëzon të drejtën e vetos në Këshillin e Sigurimit të OKB-së, si një nga pesë anëtarët e tij të përhershëm.
Zvicra nuk është anëtare e asnjë aleance ushtarake.
Miratimi i propozimit do ta pengonte qeverinë zvicerane të bashkëpunonte me ndonjë aleancë, siç ka bërë me NATO-n për tri dekada, përfshirë përmes ushtrimeve të përbashkëta, përveç rasteve kur ekziston një kërcënim.
Mbështetësit argumentojnë se angazhimi i Zvicrës ndaj neutralitetit duhet të riafirmohet dhe të mbrohet përballë çdo konflikti. Ata pretendojnë se qeveria është afruar "në mënyrë të rrezikshme" me BE-në dhe NATO-n, duke cenuar sigurinë dhe pavarësinë e veprimit të Zvicrës.
"Duke pasur parasysh gjithçka që po ndodh në botë, është më mirë që Zvicra të mbetet ashtu siç ka qenë për shekuj me radhë: neutrale dhe pa u përfshirë në konflikte anembanë globit”, ka thënë Nicola Fontanella, një votues që mbështet nismën.
Kundërshtarët, përfshirë qeverinë federale dhe parlamentin, thonë se kushtetuta i ofron tashmë qeverisë federale hapësirën e nevojshme për të mbrojtur interesat kombëtare.
Qeveria zvicerane drejtohet nga një degë ekzekutive, shtatë anëtarët e së cilës vijnë nga i gjithë spektri politik dhe i marrin vendimet përmes konsensusit.
Presidenca zvicerane kalon me rotacion çdo vit mes anëtarëve të saj dhe roli kryesisht ceremonial i presidentit, post që aktualisht mbahet nga Guy Parmelin i Partisë Popullore Zvicerane, konsiderohet si ai i "të parit mes të barabartëve".