Presidenti amerikan, Donald Trump, ka kërcënuar Bashkimin Evropian me “tarifa të rënda ose ndërprerje të plotë të tregtisë” nëse BE-ja vendos ta pranojë Kanadanë si anëtare të asociuar.
Deklarata e Trumpit vjen në një kohë kur Kanadaja po kërkon të forcojë lidhjet me Evropën, mes përkeqësimit të marrëdhënieve me Washingtonin.
Trump u tha gazetarëve të mërkurën se mund t’i përgjigjej me tarifa çdo përpjekjeje për integrimin e Kanadasë në BE, nëse një veprim i tillë do të konsiderohej armiqësor ndaj Shteteve të Bashkuara.
Ai e cilësoi si “qesharake” idenë për anëtarësimin e asociuar të Kanadasë, të hedhur më herët gjatë ditës nga presidentja e Komisionit Evropian, Ursula von der Leyen.
“Kanadaja është një partner i tmerrshëm tregtar”, ka thënë Trump para gazetarëve në aeroportin e Charlotte, kur u pyet për propozimin.
“Nëse e konsideroj këtë një akt armiqësor, do të vendos tarifa shumë të larta ose do ta ndërpres plotësisht tregtinë me Evropën në shumë sektorë”, shtoi ai.
Megjithatë, Trumpi la të hapur mundësinë për një marrëveshje, nëse, siç tha ai, qëllimet e palëve janë “të mira”. Në të kundërtën, paralajmëroi se SHBA-ja mund të vendosë “tarifa jashtëzakonisht të larta” ndaj Evropës.
Von der Leyen e prezantoi idenë që Kanadaja të bëhet anëtarja e parë e asociuar e BE-së gjatë fjalimit të saj për gjendjen e Bashkimit Evropian. Në sallë ishte i pranishëm edhe kryeministri kanadez, Mark Carney.
Propozimi befasoi kryeqytetet evropiane. Megjithatë, ende nuk është e qartë se çfarë do të përfshinte konkretisht anëtarësimi i asociuar, pasi një status i tillë aktualisht nuk ekziston në legjislacionin e BE-së.