Të paktën 27 nxënës, shumica e tyre nën moshën 13 vjeç, dhe një mësues kanë vdekur të enjten kur çatia e një shkolle u shemb ndërsa ata po zhvillonin procesin mësimorë në qytetin Peshawar të Pakistanit, njoftuan autoritetet. Por, numri i viktimave mund të rritet, raportoi Reuters.
Shumica e viktimave u sollën të vdekur në Spitalin "Lady Reading", së bashku me 20 të tjerë që u lënduan, tha zëdhënësi i spitalit Mohammad Asim.
Pamjet televizive treguan ambulanca që nxituan në vendngjarje dhe punonjës shpëtimi që nxirrnin nxënës të gjakosur nga rrënojat.
"Deri më tani kemi nxjerrë të paktën 45 fëmijë nga rrënojat", tha oficeri i emergjencave të distriktit Iftikhar Khan.
Ka raportime për më shumë fëmijë të varrosur në rrënoja, shtoi ai.
Zëvendëskryeministri i Pakistanit, Ishaq Dar, në një shkrim në X tha se shembja e çatisë së shkollës në Peshawar ka "prekur thellë të gjithë kombin".
"Fëmijët tanë janë pasuria jonë më e çmuar dhe çdo humbje e tillë është një tragjedi për të gjithë vendin".