Rusia është zotuar se do t'i "intensifikojë" sulmet ndaj Kievit, ndërsa ka akuzuar të dielën Ukrainën se po përpiqet të dëmtojë zgjedhjet parlamentare ruse, pasi Ukraina lëshoi valë dronësh drejt rajonit të Moskës në ditën e fundit të votimit, duke vrarë të paktën dy persona.
"Në përgjigje të sulmeve të regjimit të Kievit ndaj objektivave civile brenda Rusisë, ushtria ruse do të vazhdojë dhe intensifikojë sulmet e saj me saktësi të lartë kundër objektivave ushtarake në Kiev," ka deklaruar ministria ruse e Mbrojtjes.
Ky ishte sulmi më i madh ndaj Moskës që kur Kremlini ka nisur ofensivën në Ukrainë në vitin 2022 dhe përfshiu rreth 1.600 dronë, 450 prej të cilëve ishin drejtuar direkt nga kryeqyteti, ka thënë kryetari i bashkisë së Moskës, Sergei Sobyanin.
Imazhet tregonin një vrimë të madhe në një ndërtesë banimi shumëkatëshe në periferi të Moskës. Një tjetër imazh tregonte tym të zi që dilte nga ajo që dukej të ishte një rafineri nafte.
Presidenti ukrainas, Volodymyr Zelensky, i ka vlerësuar sulmet e Ukrainës, duke thënë se kundërpërgjigjet e tyre me rreze të gjatë veprimi patën një ndikim shumë të rëndësishëm në rajonin e Moskës.
Presidenti ukrainas ka thënë se mes armëve të përdorura në sulm ishte "Pelican", që fillimisht mendohej se ishte një raketë balistike me rreze të shkurtër, por që burime të mëvonshme e identifikuan si një dron me krahë.
Zelensky ka thënë gjithashtu se Ukraina kishte përdorur raketat e saj të lundrimit "Flamingo", të prodhuara në vend, për të goditur Moskën. Kjo armë me rreze të gjatë është përdorur më parë kundër objektivave thellë brenda territorit rus.