Rusët do të zgjedhin anëtarët e dhomës së ulët të parlamentit, Dumës së Shtetit, në zgjedhjet që nisin të premten dhe zgjasin deri të dielën.
Ata do të votojnë gjithashtu në zgjedhjet lokale, ku votuesit në 11 rajone do të zgjedhin guvernatorët, ndërsa në 39 rajone do të zgjidhen anëtarët e parlamenteve rajonale.
Procesi i votimit është shtrirë në tri ditë, në përpjekje për të rritur pjesëmarrjen e 111 milionë votuesve me të drejtë vote, përfshirë, për herë të parë, edhe banorët e territoreve ukrainase të pushtuara nga Rusia që nga viti 2022.
Gjysma e 450 vendeve në Dumë plotësohet përmes listave partiake, ndërsa gjysma tjetër përmes garave në zona të veçanta zgjedhore.
Klima ekonomike dhe politike është ndikuar rëndë nga katër vjet e gjysmë të asaj që Kremlini e quan “operacion special ushtarak” në Ukrainë.
Publiku nuk e sheh më luftën si diçka të largët dhe shqetësimi po rritet, pasi sulmet e shumta me dronë të armikut kanë shkaktuar dëme të mëdha në rafineritë ruse të naftës dhe në objektet logjistike.
Edhe pse partia kryesore e Kremlinit, Rusia e Bashkuar, pritet të ruajë kontrollin dërrmues mbi dhomën e ulët të Dumës, së bashku me disa parti të tjera që votojnë në përputhje me dëshirat e presidentit Vladimir Putin, autoritetet kanë forcuar kontrollin mbi këto zgjedhje, të parat që nga viti 2022.
E vetmja parti e regjistruar që kritikonte luftimet në Ukrainë është hequr nga fletëvotimi, ndërsa disa politikanë paqësor janë burgosur ose janë larguar jashtë vendit.
Me rezultatin e zgjedhjeve të paracaktuar dhe dominimin politik të Putinit, analistët thonë se Kremlini e sheh votimin si një përpjekje kyç për të mobilizuar mbështetjen e publikut për “operacionin ushtarak” në Ukrainë dhe për të legjitimuar veprimet e tij.
Pavarësisht përpjekjeve për t’i mbajtur çështjet që lidhen me Ukrainën jashtë debatit politik, disa rusë vazhdojnë të jenë të përqendruar te konflikti dhe shohin një lidhje mes tij dhe përkeqësimit të situatës ekonomike e sociale brenda vendit.