Një sulm rus ka goditur një ndërtesë të Akademisë Kombëtare të Shkencave të Ukrainës dhe një operacion shpëtimi është duke u zhvilluar.
Zjarrfikësit po luftojnë me flakët dhe po kërkojnë për këdo që mund të ketë qenë brenda, ka thënë presidenti ukrainas, Volodymyr Zelensky, në Telegram.
Forcat ruse kanë goditur gjithashtu një kompani farmaceutike dhe pika karburanti në Kiev, një qendër biznesi në Dnipro, si dhe objekte civile, ndërmarrje dhe infrastrukturë komunikimi në qytete e rajone të tjera, shtoi lideri ukrainas.
Zelensky ka thënë se ka viktima dhe u ka shprehur ngushëllime familjeve të tyre. Ai ka thënë se Rusia do të marrë një përgjigje.
"Dhe secili prej partnerëve të Ukrainës duhet ta kuptojë nga ky terror, nga sulme të tilla, se mbështetja për Ukrainën është në të vërtetë mbështetje për jetën e njerëzve, mbështetje për parimin se terrori nuk duhet të normalizohet kurrë askund. Rusia duhet të përgjigjet për të gjitha këto dhe të përballet me pasoja reale”, ka thënë ai.
Ministria ruse e Mbrojtjes ka deklaruar se forcat e saj kanë goditur dy qendra të dhënash në Kiev, si dhe pika karburanti në kryeqytetin ukrainas. Ajo ka njoftuar gjithashtu se një qendër shpërndarjeje e shërbimit postar "Nova Poshta" u godit në qytetin jugor të Odesës.
Ushtria ruse ka goditur gjithashtu një anije mallrash në Detin e Zi dhe një tjetër në portin ukrainas të Chornomorsk-ut, ka thënë ministria.
Sulmet synojnë të kufizojnë eksportet e grurit të Ukrainës, ndonëse ato mund të shkaktojnë gjithashtu mungesa ushqimore në vendet që varen nga importet ukrainase.