Policia britanike ka bëë të ditur se pesë burra të arrestuar pranë një baze ajrore amerikane po mbahen nën dyshimin se po përgatitnin një akt terrorist.
Policia Metropolitane, e cila udhëheq hetimet për aktivitetet e dyshuara terroriste, ka thënë në një deklaratë të dielën se burrat fillimisht u arrestuan nën dyshimin për kryerjen e veprave penale në bazë të Ligjit për Eksplozivët.
Vicki Evans, zëvendëskomisionere ndihmëse, ka thënë se është vendosur një kordon sigurie në një rreze prej 400 metrash rreth tri automjeteve që ngritën dyshime, ndërsa ushtria po kryen ekzaminimet.
Tetëdhjetë e pesë familje janë evakuuar dhe janë dërguar në një qendër të afërt rekreative në orët e para të mëngjesit të së dielës, ndërsa ekipi i ushtrisë për çaktivizimin e bombave ekzaminoi tri automjete të dyshimta.
Materialet u sekuestruan pas arrestimeve nga oficerë të armatosur në bazë të Ligjit për Eksplozivët dhe po ekzaminohen për të përcaktuar se sa të rrezikshme janë dhe nëse teknikisht mund të përdoreshin në një sulm, sipas asaj që ka mësuar gazeta The Guardian.
Operacioni nuk ishte i bazuar në informacione paraprake të inteligjencës, çka sugjeron se hetuesit nuk kishin dijeni më herët për ndonjë komplot të mundshëm.
“Rreth orës 00:45 të mëngjesit të sotëm, policia mori një telefonatë lidhur me tri automjete të dyshimta që po udhëtonin drejt RAF Fairford. Oficerët e armatosur reaguan dhe më pas arrestuan pesë burra në zonën e Whelfordit, nën dyshimin se kishin kryer vepra penale sipas Ligjit për Eksplozivët. Burrat u dërguan në paraburgim, ku vazhdojnë të qëndrojnë”, ka thënë ndihmësshefi i policisë Richard Ocone nga policia e Gloucestershire.
