Kryeministri izraelit Benjamin Netanyahu ka publikuar një video duke e pritur pasagjerin që pretendohet se e neutralizoi pilotin që tentoi ta rrëzonte aeroplanin e fluturimit Dubai – Tel Aviv, transmeton "BBC".
Aeroplani bëri ulje emergjente në Arabi Saudite të mërkurën, ndërsa pasdite dhjetëra pasagjerë izraelitë u kthyen me aeroplan tjetër në Izrael.
Netenyahu e ka quajtur pasagjerin Yaniv si hero.
“Është thjeshtë e pabesueshme ajo që bëre”, tha Netanyahu.
Yaniv tregoi se piloti që ishte goditur me thikë nga bashkëpiloti ishte pranë derës, por para se të rrëzohej ai arriti ta hapte derën për të lejuar hyrjen te kabina.
“Kur hyra, e pashë sulmuesin mbi instrumentet, mes dy ulëseve... nuk kishte pilotë në ulëse. Njëri ishte i rrëzuar, ndërsa tjetri ishte mbi instrumentet. Dhe një tjetër djalë hyri me mua. E kapa sulmuesin, e vura në mbërthim dhe e tërhoqa – para së gjithash – jashtë”, tha Yaniv.
Ai thotë se sulmuesi “po përpiqej të shkatërronte instrumentet, me qëllim që ta çaktivizonte avionin”.
Yaniv më pas thotë se u bëri thirrje “djemve izraelitë që ishin në avion” dhe së bashku “e mbajtëm të shtrirë sulmuesin”.
Yaniv gjithashtu thotë se “tërhoqi komandat çe avionit]”.
“Ti tërhoqe komandat?” e pyeti Netanyahu.
“Unë shikoj Air Crash Investigation, zoti kryeministër”, përgjigjet Yaniv. “Dhe avioni filloi të nivelizohej, pak më shumë, dhe më pas piloti më tha se ai do ta merrte kontrollin prej aty”.
Një tjetër pasagjer, i cili ka folur me gazetarët jashtë aeroportit Ben Gurion, thotë se incidenti në bord zgjati ndoshta pesë minuta, por iu duk “si ferr”.
Oran Choen thotë se dëgjoi të thirrej “Allahu Akbar” para se avioni të fillonte të binte me shpejtësi, ai nuk specifikon se kush e tha “Allahu Akbar”.
“Ndoshta zgjati pesë minuta, por dukej si ferr – dëgjova vëllain tim pas meje duke bërtitur se do të vdisnim”, shton ai.
Zvika Meness, një pasagjer që thotë se ndihmoi në neutralizimin e sulmuesit në fluturimin e devijuar, u ka thënë mediave izraelite se ai dhe dy pasagjerë të tjerë e lidhën sulmuesin me lidhëse plastike dhe kufje.
Meness, për të cilin raportuam më herët se e kishte përshkruar incidentin si “traumatik”, i tha transmetuesit publik izraelit Kan se një pilot që ndodhej në kabinën e pasagjerëve hyri në kabinë pasi dëgjoi të bërtitura.
“Ishte një incident shumë i vështirë. Ne të tre u hodhëm dhe e neutralizuam”, thotë ai. “Një pilot tjetër, i cili ishte ulur në kabinën e pasagjerëve, hyri për të zëvendësuar pilotin shtesë dhe, në thelb, ata e ulën avionin”.
