Kulla Eiffel është mbyllur të hënën pasi punonjësit hynë në grevë për shkak të largimit të punonjëseve gra gjatë vizitës së një grupi fetar hindu, kanë bërë të ditur punonjësit dhe drejtuesit.
Një delegacion prej rreth 100 personash, të lidhur me grupin Bochasanwasi Akshar Purushottam Swaminarayan Sanstha (BAPS), vizitoi monumentin në kryeqytetin francez të shtunën.
Përfaqësuesja e sindikatës së punonjësve, Diane Davoine, ka thënë se sapo delegacioni mbërriti në monument, grave iu kërkua të largoheshin.
“Gjatë vizitës së këtij delegacioni, grave iu kërkua të largoheshin nga vendet e tyre të punës, në mënyrë që aty të vendoseshin burra”, ka thënë ajo për Reuters. Davoine ka thënë gjithashtu se drejtuesit u kishin kërkuar më pas falje punonjësve për incidentin.
“Kjo sigurisht që nuk pritet mirë nga punonjësit, veçanërisht nga gratë, të cilat të gjitha janë ndier të poshtëruara nga ajo që ndodhi dhe nga mënyra se si u trajtuan”, ka thënë Davoine.
“Tensionet u rritën gjatë fundjavës, ndaj këtë mëngjes punonjësit vendosën të mblidheshin: së pari, për të hapur një dialog me drejtuesit dhe, së dyti, për të siguruar që gratë të mos trajtohen më kurrë në këtë mënyrë në kompani”, ka shtuar ajo.
Société d’Exploitation de la tour Eiffel (SETE), kompania që administron monumentin në Paris, ka konfirmuar se delegacioni kishte kërkuar që vizita të organizohej në mënyrë që të kufizoheshin “ndërveprimet me gratë”, sipas agjencisë së lajmeve AFP.
Kompania i ka thënë AFP-së se “këto kushte nuk duhej të ishin pranuar”.
Ajo ka shtuar se ato “nuk ishin në përputhje me vlerat e SETE-së dhe as me parimet e barazisë midis burrave dhe grave”.
“Është qartësisht një praktikë e papranueshme. Ritheksoj përkushtimin e Kullës Eiffel ndaj vlerave republikane dhe barazisë midis burrave dhe grave”, ka thënë presidenti i SETE-së, Ariel Weil.
BAPS-ja ka përuruar të dielën tempullin e saj të parë madhor në Francë, në periferi të Parisit.
Në një deklaratë në X, tempulli BAPS në Paris ka thënë se vizita ishte “organizuar në bashkëpunim me ekipin e Kullës Eiffel në fillim të orarit normal të hapjes, për të shmangur ndërprerjen ose shqetësimin e të tjerëve”.
Ai ka kërkuar falje “për çdo dhimbje apo shqetësim të shkaktuar”, duke shtuar: “Ne besojmë në vlerat universale të respektit të ndërsjellë dhe shërbimit”.
Në faqen e saj të internetit, BAPS e përshkruan veten si një “bashkësi shpirtërore e drejtuar nga vullnetarët, e përkushtuar për përmirësimin e shoqërisë” përmes vlerave hindu.
Ajo ka tempuj në qytete të mëdha në mbarë botën, përfshirë Londrën, Los Anxhelosin dhe Sidnein.
Kryetari i Bashkisë së Parisit, Emmanuel Gregoire, ka thënë se do të zhvillohej një hetim mbi rrethanat e vizitës.
“Po marr parasysh zemërimin e shprehur nga punonjësit e Kullës Eiffel dhe dua t’u them se pakënaqësia e tyre është e ligjshme”, ka shkruar ai në X.