Kryeministri kanadez, Mark Carney, e ka mirëpritur propozimin që Kanadaja të bëhet anëtarja e parë e asociuar e Bashkimit Evropian, por ka theksuar se nuk synonte që një aleancë më e ngushtë të krijonte një bllok të ri që do të rivalizonte fuqitë e mëdha botërore.
Këto komente kanë ardhur pasi presidenti amerikan, Donald Trump, ka sugjeruar se marrëveshja e propozuar mund të ishte një "akt armiqësor" dhe ka kërcënuar me tarifa të larta ndaj Evropës, nëse do t'i konsideronte qëllimet e saj si jomiqësore ndaj SHBA-së.
Trumpi e ka quajtur gjithashtu idenë "qesharake".
"Ne e mirëpresim këtë ambicie”, është shprehur Carney në Parlamentin Evropian lidhur me propozimin e presidentes së Komisionit Evropian, Ursula von der Leyen, për anëtar te asociuar.
Carney e ka shpjeguar qartë atë që po propozonte: një integrim më të thellë mes Kanadasë dhe Evropës në fusha të tilla si tregtia, mbrojtja, mineralet kritike, inteligjenca artificiale, energjia, hapësira, kërkimi shkencor dhe shërbimet financiare, me qëllim që të dyja palët të jenë më pak të cenueshme ndaj presioneve ekonomike dhe gjeopolitike.
"Unë nuk po propozoj një bllok të tretë për t'u bërë një rival i fuqisë së madhe”, ka thënë ai.
Carney ka thënë se qëllimi, përkundrazi, është të ndërtohet qëndrueshmëria e Kanadasë, në mënyrë që asnjë vend të mos mund t'i kontrollojë tregjet e saj, të minojë sovranitetin e saj apo t'i diktojë zgjedhjet e saj.