-
Çeviren: Flutura Gashi-Mehmeti
- 20 Ekim 2026 13:42
- Şurada paylaş:
Mbretëria e Bashkuar do të dislokojë avionë luftarakë Typhoon të Forcave Ajrore Mbretërore (RAF) për të mbrojtur Arabinë Saudite, si përgjigje ndaj përshkallëzimit të sulmeve me raketa dhe dronë nga rebelët Houthi, ka bërë të ditur sekretari britanik i Mbrojtjes, Wes Streeting.
Misioni mbrojtës do të ndihmojë në mbrojtjen e qyteteve dhe infrastrukturës saudite nga sulmet ajrore të grupit të mbështetur nga Irani, ka thënë Streeting në një deklaratë me shkrim të publikuar të martën.
Ky vendim vjen pas sulmeve të Houthive me dronë dhe raketa balistike ndaj kryeqytetit saudit, Riadit, si dhe ndaj objekteve energjetike në bregdetin e vendit.
“Këta avionë do të veprojnë në rol mbrojtës dhe nuk do të kryejnë sulme kundër Houthive”, thuhet në deklaratë.
Houthitë janë të përfshirë në një luftë civile me qeverinë e Jemenit, e cila njihet ndërkombëtarisht dhe mbështetet nga Arabia Saudite.
Mbretëria e Bashkuar do të dërgojë gjithashtu këshilltarë ushtarakë dhe një avion transporti A400M të Forcave Ajrore Mbretërore.
Londra zyrtare po i ofron Arabisë Saudite pajisje mbrojtëse ushtarake për t’u mbrojtur nga sulmet ajrore, si dhe furnizim me karburant në ajër për operacionet mbrojtëse saudite. Mbështetja për furnizimin me karburant është zgjatur tashmë edhe për 90 ditë.
Në një deklaratë të veçantë, Streeting ka thënë se shënjestrimi i aeroportit të Riadit “tregon deri në çfarë mase po shkojnë Houthitë për ta përshkallëzuar situatën në rajon”.
“Prandaj, sot kam miratuar mbështetje të mëtejshme ushtarake nga Mbretëria e Bashkuar”, ka shtuar ai.
Houthit kanë kryer sulme me raketa dhe dronë ndaj aeroporteve, objekteve të naftës dhe gazit, si dhe bazave ushtarake në Arabinë Saudite, në shenjë hakmarrjeje për sulmet ndaj territoreve që ata kontrollojnë në Jemenin perëndimor, përfshirë kryeqytetin Sana.