Grupi Volkswagen ka rreth 60 për qind më shumë të punësuar se Toyota, por prodhuesi japonez njëkohësisht prodhon dhe shet dukshëm më shumë automjete. Për këtë arsye, gjiganti gjerman i veturave po zbaton një plan të gjerë ristrukturimi, i cili mund të çojë në shkurtimin e deri në 140 mijë vendeve të punës.
Sipas të dhënave, Grupi Volkswagen aktualisht ka rreth 629 mijë punonjës në mbarë botën, ndërsa Toyota rreth 391 mijë. Pavarësisht se ka rreth 240 mijë punonjës më pak, Toyota ka shitur 5.39 milionë automjete gjatë gjysmës së parë të vitit, ndërsa Volkswagen 4.13 milionë.
Megjithatë, krahasimi mes dy kompanive nuk është plotësisht i drejtpërdrejtë. Volkswageni vazhdon të kryejë një pjesë të madhe të proceseve të prodhimit brenda kompanisë, përfshirë prodhimin e komponentëve, zhvillimin dhe inxhinierinë.
Ky model biznesi ka qenë për vite me radhë një nga pikat e forta të kompanisë dhe e ka ndihmuar atë të shndërrohet në një nga prodhuesit më të mëdhenj industrialë në botë. Por në të njëjtën kohë, ai ka sjellë edhe kosto të larta operative, të cilat po bëhen gjithnjë e më të vështira për t’u përballuar.
Për të ulur kostot dhe për të rritur efikasitetin, Volkswageni ka zgjeruar planin e ristrukturimit. Sipas vlerësimeve aktuale, kompania mund të shkurtojë deri në 140 mijë vende pune, me synimin për të kursyer miliarda euro.
Volkswageni nuk është i vetmi prodhues veturash që po përshtat operacionet e tij me ndryshimet në treg. Edhe prodhues të tjerë gjermanë po ndërmarrin masa të ngjashme, siç është BMW-ja, Porsche e Mercedesi.
Industria e veturave është përballur vitet e fundit me një sërë sfidash, përfshirë fuqizimin e prodhuesve kinezë në tregun global, rënien e përfitueshmërisë në Kinë, rritjen më të ngadaltë se sa pritej të kërkesës për automjete elektrike, tarifat amerikane, çmimet e larta të energjisë dhe pasigurinë gjeopolitike.