​Apple është duke prodhuar në mënyrë sekrete ekrane me rezolucion Full HD MicroLED, të cilat janë më të ndritshme, më të holla dhe me efiçencë energjie më të madhe se sa ekranet e tanishme.

Modelet e reja iPhone në të ardhmen do të jenë të pajisura me ekrane të tilla, sugjeron një kërkim sekret i kompanisë nga Kupertino.

Ekspertët e kompanisë janë duke punuar në ekranet MicroLED, të cilat do të zëvendësojnë ekranet aktuale, sipas burimeve industriale, transmeton ksp.

Nëse del të jetë e suksesshme, teknologjia mund të adresojë një problem të zakonshëm në ekranet OLED, i cili rrjedh nëse fotografia statike mbetet në ekran për një kohë të gjatë.

Projekti është duke u mbikëqyrur nga Lynn Youngs, i cili është në krye të teknologjisë së ekraneve iPhone dhe Apple Watch, thonë burime të njohura me çështjen.

Kompania synon përdorimin e teknologjisë së re në kompjuterët e saj, ndërsa në telefona duhet të pritet edhe tri vjet.