Instagrami do t’i paralajmërojë përdoruesit e vet kur një përshkrim i një fotografie apo videoje që ata e postojnë konsiderohet si abuzim apo shkelje e rregullave.

Kompania, që për pronar e ka Facebookun, ka thënë se e ka trajnuar një sistem për të detektuar përshkrimet abuzuese.

Qëllimi i kësaj është që përdoruesve t’u jepet “një shans për të pauzuar dhe për të konsideruar fjalët e tyre”.

Instagrami ka bërë të ditur për veçorinë e re përmes një blogu të hënën, duke thënë se përditësimi do të dalë menjëherë në disa shtete.

Veçoria është dizajnuar për të ndihmuar parandalimin e ngacmimit online, që është bërë problem enorm për platformat si Instagrami, YouTube e Facebooku.

Instagrami ishte renditur si platforma më e keqe online në luftën kundër ngacmimit, në një studim të vitit 2017.

Nëse një përdorues me këtë veçori shtyp një përshkrim abuzues, do të marrë një njoftim menjëherë se postimi është i ngjashëm me ato që janë raportuar për ngacmim. Përdoruesve më pas do t’u jepet opsioni për të edituar shkrimin para publikimit.

Sipas Instagramit, ky paralajmërim do të ndihmojë në edukimin e njerëzve për atë se çka nuk lejohet në rrjete sociale.