Google do t’i pyesë përdoruesit në Evropë se cilin browser dëshirojnë ta përdorin në Android

Google do t’i pyesë përdoruesit në Evropë se cilin browser dëshirojnë ta përdorin në Android

22 March 2019 13:23

Disa vjet më parë, nën presionin e Bashkimit Evropian, Microsofti u detyrua ta përfshijë opsionin e zgjedhjes së internet browserit në Windows 7 dhe Windows 8, duke ua mundësuar përdoruesve qasjen në zgjidhjet alternative në raport me atë që vinte i parainstaluar (Internet Explorer). Tani, e njëjta gjë po ndodh me kompaninë Google por në këtë rast, për sistemin operativ mobil të kompanisë - Android, përcjell Neowin.

Google ka njoftuar se përdoruesve në Evropë do t’ua mundësojë të dinë se cilët browserë janë për ta në dispozicion për t'u instaluar në Android, duke u mundësuar që ta instalojnë atë që e preferojnë. E njëjta gjë vlen edhe për motorët e kërkimit, pasi që Google tradicionalisht e dominon këtë treg, shkruan KOHA Ditore.

Komisioni Evropian e akuzon Google për shkelje të shumta të rregullave anti-monopol dhe abuzim me pozitën dominuese në fushën e motorëve të kërkimit, gjë që ka rezultuar kohët e fundit me një gjobë të madhe prej 4.34 miliardë euro. Pas kësaj, Google e ka ndryshuar politikën e vet të licencimit të aplikacioneve Android për t’i shmangur problemet shtesë, pavarësisht faktit se kompania e ka mohuar çfarëdo paligjshmërie në praktikën e vet.

Është e paqartë se kur do të fillojnë përdoruesit ta shohin opsionin e zgjedhjes së browserit të preferuar, por Google thekson se kjo do të ketë ndikim në përdoruesit e rinj dhe ekzistues të Androidit.

© KOHA. Të gjitha të drejtat janë të rezervuara.

Komentet

Shto koment

Të ngjashme